Бишкекте кымыз борборун түзүү зарылдыгы айтылды
© Sputnik / Асылбек Бактыбеков
Жазылуу
Легендалуу парламенттин депутаты, коомдук жана саясий ишмер, саяпкер Кемел Ашыралиев кыргыздын кымызын дүйнөгө таанытып, анын касиетин даңазалоо керектигин айтты.
Бишкекте кымыз борборун түзүп, көрүнгөн жерде саттырбаш керек. Ичинде кымыздын сапатын текшерген лаборатория ачып, республикадан келген бардык кымызды бир жерге топтоо зарылдыгын Кемел Ашыралиев Sputnik Кыргызстан радиосуна маек куруп жатып билдирди.
Бишкекте кымыз борборун түзүү зарылдыгы айтылды
Анын айтымында, борбор түзүлсө туристтерди тартууга, жакшы кымызды тандоого, дарылык касиетин алууга мүмкүнчүлүк болот.
"Кыргыздын кымызынын касиети тууралуу чоң илимий изилдөөлөр керек. Кымыз ичип жүргөн адамдын дени сак болот, иммунитети жогору болуп, узак жашайт. Акыркы мезгилде кымыздын баркын кетирип, түрдүү кошулмаларды кошуп, уйдун сүтүн аралаштырып, суу кошуп, сапатын да төмөндөтүп жиберишти. Ошондуктан Бишкекте кымыз борборун түзүү керек деген сунушту берем. Ар кайсы региондон каалаган жерде сатып жатышат. Борборго атайын лаборатория түзүп, кымыздын сапатын, майлуулугун, тыгыздыгын, кычкылдуулугун текшерип, анан сатыкка койсок болот. Ал жерде кымызды өткөрүүгө, сатып алууга, дарыланууга, эс алууга шарт түзүп койсо, туристтерди тартууга, сапаттуу кымызды ичүүгө да мүмкүн болот. Атаандаштык жаралып, ар бири жакшы кымыз алып келгенге аракет көрүшөт эле. Имараттын ичине кымыздын пайдалуулугун, түрлөрүн жазып, кызыктуу маалыматтарды илип, Саякбай, Сагымбай, Тыныбек манасчылар ичкен кымыз деп даңазалаш керек", — деди Ашыралиев.
Ошондой эле ал ар бир кыргыз баласы ат минип турушу керектигин кошумчалады.
