Ишенапысова: эмдөөдөн кийин баланын абалына байкоо салуу зарыл
© Sputnik / Арууке Амирдинова
Жазылуу
Республикалык эмдөө борборунун директору Гүлбара Ишенапысова эмдөөдөн кийин баланын ата-энесине бир нече кеңешин сунуштады.
Өлкөнүн бардык аймагында кызамыкка жана кызылчага каршы эмдөө өнөктүгү жүрүүдө. Былтыр кызамык оорусунун күч алышына байланыштуу республикада эки баскычтуу эмдөө өнөктүгү өтүп келе жатат. Бул жолку өнөктүктүн алкагында вакцинаны биринчи кезекте 9 айлык курактан 7 жашка чыга элек эмделбеген балдар алат. Ошондой эле кызамык оорусунун белгилери бар адамдар менен байланышта болгондорго да сайылат. Бул тууралуу Гүлбара Ишенапысова Sputnik Кыргызстан радиосунун эфиринде маек куруп жатып билдирди.
Ишенапысова: эмдөөдөн кийин баланын абалына байкоо салуу зарыл
Анын айтымында, өткөн жылдан бери өнөктүктүн алкагында 818 939 бала эмделди.
"Көпчүлүк ата-эне эмдөөдөн кийин эмне кылуу керектигин биле бербейт. Социалдык тармакта айтылган ар кандай маалыматтарга ишенип алышат. Негизи медайымдар эмдөөдөн кийин баланын ата-энесине медициналык мекеменин жанында 30 мүнөт жүрүүнү талап кылат. Дароо үйүнө кетирбейт. Анткени вакцинага аллергиялык реакциялар пайда болгон учурда дарыгерлер гана тез жардам көрсөтө алат. Ал эми баланын абалы жакшы болсо ата-энеге эмдөөдөн кийин эмне кылышы же кылбашы керектигин түшүндүрүп, үйүнө жөнөтөбүз. Үйдө баланын абалын жакшылап байкап туруңуз. Эмдөөдөн кийин балада ысытма же инъекция болгон жери кызарып, шишиши мүмкүн. Бирок мында коркуунун кереги жок. Температура 38ге чейин көтөрүлгөндө врач жазып берген антипиретикалык дарыларды жана көбүрөөк суюктук берип, жылуу суу менен сүртүңүз. Ийне сайылган жерге компресстерди жана майларды койбоңуз. Ошондой эле бир нече күн балаңызга жаңы кошумча тамактарды бербөөгө аракет кылыңыз. Вакцина алгандан баштап үч күнгө чейин жуундурбаңыз. Эл көп чогулган жерлерден алыс болуңуз, конокко барбаңыз жана үйүңүзгө чакырбаңыз. Бала эмдөөдөн кийин инфекция жуктурушу ыктымал. Эгерде температура төртүнчү күнү да түшпөй жатса дароо дарыгерге кайрылуу керек", — деди Ишенапысова.
Дарыгер кызамык коркунучтуу жана өтө жугуштуу вирустук оору экенин, өтүшүп кетсе өлүмгө алып келерин кошумчалап, ата-энелерди вакцина алууга чакырды.
