Жол эрежесин одоно бузган 30 автобус айдоочусу иштен кетти
"Мэрдин тапшырмасы менен мамлекеттик жана муниципалдык кызматкерлер шейшемби, бейшемби күндөрү өзүбүздүн жеке автоунааларды токтотуп, коомдук транспорт менен жумушка келебиз. Мэр баш болгон мамлекеттик кызматкерлер коомдук транспортко түшкөндө ошол жерде эмне маселе болсо видео же сүрөткө тартып кабарлайбыз. Маселе дароо чечилет. Азыр мамлекет жакшы колдоп, жаңы автобустар алынып жатат. Биз айдоочуларга "бул аманат, жакшы айдап пенсияга чыгып кетсең болот" деп жатабыз. Рейдге чыгып троллейбус, автобустардын тазалагын, накталай эмес төлөмгө түзүлгөн шартты, аялдамаларга кандай токтоп жатканын текшеребиз. Эгер туура эмес токтосо ошол жерден эле видеого тартып, тартиптик комиссияга беребиз. Эреже бузган айдоочуларга премиядан ажыратуу, айлыгын кыскартуу, эскертүү, сөгүш берүү, жумуштан кетирүү сыяктуу жазалар колдонулат. Айдоочу жол чырагы кызыл күйгөндө өтүп кетип же каршы тилкеге чыккан болсо, ошого жараша чара көрүлөт. Аларды далилдер менен жол инспекторлоруна тапшырып, андан сырткары, тартиптик комиссия тарабынан каралып жумуштан кетирүүгө чейинки жазалар көрүлүүдө. Жалпы 2 600 айдоочу бар. Быйыл жол эрежесин одоно бузган 30дай айдоочу кызматтан кетти, ушундай эреже бузган дагы 30дай айдоочунун иши каралууда. Катуу чаралар көрүлүп жатат, себеби адам өмүрү баарынан кымбат", — деди Капаров.
