Министрлик: аттракцион иштеткендерге талаптар күчөтүлдү
© Sputnik / Арууке Амирдинова
Жазылуу
Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматынын өнөр жай коопсуздук башкармалыгынын улук инспектору Гүлайым Исманбекова аттракциондорду коопсуз иштетүүнүн талаптарына токтолду.
Эксплуатациялык документи жок же жараксыз абалга келген учурда аттракцион токтоп турууга тийиш. Документтер калыбына келтирилгенден кийин иштетүүгө уруксат берилет. Бул тууралуу Гүлайым Исманбекова Sputnik Кыргызстан радиосунун эфиринде маек куруп жатып билдирди.
Министрлик: аттракцион иштеткендерге талаптар күчөтүлдү
Анын айтымында, аттракциондорду коопсуз иштетүү үчүн ишкерлерге коюлган талаптар күчөтүлдү.
"Эс алуу жайларындагы соңку учурларды эске алуу менен ушул жылдын 23-июнунда №171 токтомго өзгөртүүлөр киргизилип, талаптар күчөтүлдү. Ага чейин министрлер кабинетинин 2024-жылдын 12-апрелиндеги №171 токтому менен "Аттракциондорду коопсуз иштетүү" эрежелери бекитилген. Негизи 2018-жылы апрель айында Бажы биримдиги аттракциондордун коопсуздугу боюнча техникалык регламенттерди ратификациялаган. Бирок андан бери коопсуздук боюнча эрежелер кабыл алына элек болчу. Ошол талаптар бүгүнкү күндө кабыл алынып, иш алып барып баштадык. Буга чейин деле профилактикалык иш-чараларды жүргүзчүбүз. Жайкы сезон алдында аттракциондору бар ар бир парктарды, мекемелерди кыдырып, ишкерлердин жоопкерчилиги тууралуу эскертмелер берилип, коопсуз иштөө боюнча талаптар коюлуп келген. Механизациялаштырылган аттракциондорго гана талаптар болсо, эми механизациялаштырылбаган аттракциондорго (аквапарктар, бассейндер, көлмөлөр жана жылгаяктар, селкинчектер, батуттар) да эреже каралды. Аны аттракциондордун ээлери сактоого милдеттүү. Ар бир аттракциондун формуляры, паспорту, эксплуатациялоо боюнча колдонмо, тейлөө жана оңдоо, ошондой эле монтаждоо (чогултуу, орнотуу), ишке киргизүү, жөнгө салуу боюнча нускамасы, мындан тышкары, аттракционду эксплуатациялоону жана техникалык тейлөөнү эсепке алуу журналы болуусу зарыл. Эгерде аттракциондун иштөө мөөнөтү бүткөн болсо, ал жараксыз болот. Механизациялаштырылган аттракциондорду орнотууда долбоор керек. Акыркы токтом боюнча долбоор экспертизадан өтүп, текшерилет. Андан кийин гана иштетүүгө уруксат берилет. Ал эми иштетилип жаткан аттракцион оператор менен камсыздалышы керек. Ал окутуудан өткөн билими бар гана адис болуусу шарт. Оператор жыл сайын билимин жогорулатып туруусу абзел", — деди Исманбекова.
Ал азыркы тапта эс алуучу жайларда аттракцион иштеткендерге эскертүүлөр берилип, профилактикалык иштер жүргүзүлүп жатканын, эгер мыйзам бузуу катталса ишкердик субъектиге 13 000 сом, ал эми жеке жакка 3000 сом өлчөмүндө айып пул салынарын кошумчалады.
