Калдыбаева: коуч, насаатчы, психологдон билим аларда адисти жакшылап караштыргыла

"Тилекке каршы, учурда коуч, психолог окутуучулардын деңгээли начар. Бул тармакты кичине үйрөнүп алып эле окутуучу болуп чыга келип жатышат. Негизи, керектүү деңгээлде академиялык билим алышы керек. Анткени адамдарды окутуу — чоң жоопкерчилик. Айтып берип жаткан нерсең менен алардын тагдырында оң же терс роль ойноп калышың мүмкүн. Мындай учурлар көп. Учурда коуч же психологдор жашоосунунун буга чейинки же учурдагы көйгөйлөрүнө, жан дүйнөсүндөгү жарааттарына таянып, окутуп коюп жатышат. Өзүнүн үй-бүлөлүк атмосферасында эркектин ролу кандай болсо, аялзатына эркектин баары ошондой деп ынандырышат. Бул, албетте, кооптуу. Негизи адам бирөөнү окутуудан, кеңеш берерден мурда алгач өзү даярданып, иштеши керек. Көйгөйлөрүнөн, таарынычтарынан арылышы зарыл. Ошондо моралдык жактан укугу болот. Жубайлардын көйгөйлөрү менен иштешүүдө экөө менен тең иштешиң керек. Күйөөсүн көрбөй, аны менен жеке сүйлөшпөй туруп, аялынын айтканы боюнча бүтүм чыгаруу туура эмес. Бизде аял окуп, эркек окубаган тенденция бар. Мындан улам келиндин айткандарын гана угуп, "сен күйөөң менен тез арада ажыраш, аны менен келечегиң жок" деп окутуп коюшат. Соңунда аял эмоция коштогон абалы менен барып ажырашат. Бирок кийин өкүнөт. Өзүн-өзү өнүктүргүсү келгендер азамат, аларды колдойм! Бирок тамакты ылгап жегендей эле билим аларда адисти аябай изилдеңиз. Электен өткөрүңүз. Акча табууну көздөгөн коуч-тренер, психологдор менен билимдүү адистерди чаташтырып албаңыз", — деди Калдыбаева.