Тойгонбаева: “KG тай” эл аралык фестивалына жети өлкөнүн балдары катышты
“Фестивалды биринчи ирет уюштурганда балдар Бишкектен, басымдуу бөлүгү Ысык-Көлдөн келип катышкан. Ал эми Өзбекстандан бир, Казакстандан эки-үч гана жаш талант келген. Кийинки жылы пандемияга туш келип калдык. Буга байланыштуу иш-чараны онлайн уюштурганбыз. Анткени пандемиядан улам чек аралар жабылып, балдардын келишине тоскоолдук жаратты. Бирок жыйырмадай өлкөдөн өтүнмө түшкөн. Бул бизге тажрыйба болду. Бирок мындай иш-чараларды жүз көрүшүп өткөргөнгө жетпейт экен. Соңку эки жылдан бери сынакты Бишкекте өткөрүп калдык. Быйыл да Маданият министрлигинин колдоосу, каржылоосу менен борбордо уюштурулду. Фестивалга катышкандардын саны жыл сайын өсүп, бул жолу жети өлкөнүн (Кыргызстан, Армения, Болгария, Өзбекстан, Казакстан, Тажикстан) таланттуу балдар келип ат салышты. Эл аралык деген атка татыды”, — деди Тойгонбаева.
