Апазов: уяң жүндү Европадан сатып көрдүк, суроо-талап күч экен
© Sputnik / Асылбек Бактыбеков
Жазылуу
"Кыргыз жүн" улуттук ассоциациясынын аткаруучу директору Алыбек Апазов Европага 120 тоннага жакын уяң жүн сатылганын айтты.
Ысык-Көл облусунун Ак-Суу районунда кара жүндөн жер семирткич алуу ишканасы ачылды. Муну менен бирге уяң жүндү кайра иштетүү боюнча Токмоктогу "Касиет" камволдук-нооту комбинаты менен сүйлөшүлүп жатат. Бул тууралуу Алыбек Апазов Sputnik Кыргызстан радиосуна маек куруп жатып билдирди.
Апазов: уяң жүндү Европадан сатып көрдүк, суроо-талап күч экен
"Биздин ассоциация уяң жүндүү койлорду кармоочу 36 фермер менен илимий адистердин мүчөлүгүндө 2022-жылы уюштурулган. Бүгүнкү күндө саныбыз 60тан ашты. Андан сырткары, 300дөн ашык чарбанын уяң жүн менен алектенүү ниети бар. Эки жылда жүндү экспорттоо жагын өздөштүрүп, тажырыйбага ээ болдук. Европага 120 тоннага жакын жүн чыгарып саттык. Баасына фермерлер канааттанды. Канча жылдан бери кой чарба тармагы таланып-тонолуп кетти. Буга чейин кытайлык ишкерлер өтө арзан баага алып калган. Малчынын мээнети акталбай кыйынчылыктарга тушукту. Алардын эмгеги акталсын деген ниет менен Европага чыгарганда бир топ кыйынчылыктарга дуушар болдук. Бирок анткен менен максатыбыз орундалып, жүн Европага жетип, жуудуруп базарга чыгарып сатып көрдүк. Буюрса, биздин уяң жүнгө суроо-талап да көп экен. Алардын санын көбөйтүүнү максат кылуудабыз, ошентсе да финансылык жактан пайдасы аз болгондуктан көптөрү бул койлорду бакпай калышты. Ошол себептен уяң жүндүү койлор жоголуп кетпесин деген ниетте ассоциация түзгөнбүз", — деди Апазов.
Ал жүндү кайра иштетүүчү ишканалар ишке кирсе сыртка ташуу түйшүгү жеңилдей турганын кошумчалады.
