Күнүмдүк жаңылыктар 15:00

Күнүмдүк жаңылыктар 15:00
Жазылуу
Улуттук банкта отуз жылда 16 тонна алтын чогулса, үч жылда 35 тонна алтын кошулду. Бул тууралуу президент Садыр Жапаров "Кабар" улуттук маалымат агенттигине курган маегинде билдирди. Анын айтымында, экономиканын өсүшүнө, инфляциянын төмөн кармалып турушуна Улуттук банктын салымы чоң. "Жалпы эл аралык резерв бүгүнкү күнгө 3 миллиард 491 миллион долларга жетти. Көз карандысыздыгыбыздан бери 2020-жылга чейин эл аралык резерв болгону 2 миллиард 424 миллион доллар болгон. Бүгүнкү күндө Улуттук банк 1 миллиард 67 миллион долларды үч жылда эле үстүнө кошту", — деген мамлекет башчы. Ошондой эле президент алтындын запасы боюнча да айткан.
Азыр алынып жаткан карыздардын ар бир долларын өзүн-өзү актай турган конкретүү долбоорлорго жумшайбыз. Карызды кайтаруу убагы келгенде каражат республикалык бюджет, элдин эсебинен төлөнбөйт. Бул тууралуу президент Садыр Жапаров "Кабар" улуттук маалымат агенттигине курган маегинде айтты. Президент коомчулуктан сырткы карыз тууралуу кеп кылбоону өтүнүп, мындан ары бул жаатта жооп берилбей турганын айткан. Бересени кайра кайтаруу учуру келгенде ал элдин эсебинен, республикалык бюджеттен төлөнбөй турганын айткан. "Өзүн-өзү актай турган долбоорлого алып жатабыз. Бир эле мисал келтирейин. "Камбар-Ата 1" ГЭСинин курулушуна 5-6 миллиард доллардын тегерегинде акча жумшалат. Бул долбоор бүтүп, ишке киргенден тарта, 13-15 жылда өзүн-өзү толук актайт. Бул долбоорго кеткен карызды кайтаруу убагы келгенде республикалык бюджет, эл төлөбөйт. Карызды кайтаруу мөөнөтү келгенче эле "Камбар-Ата— 1" ГЭСи өзүн-өзү актап бүтөт", — деген мамлекет башчы. Ал бирок өзүн актабай турган долбоорлорго жол курууга алынуучу насыялар кирип калаарын белгилеген. Жапаров аталган долбоорлор өзүн кантип актай турганын түшүндүрүп берген.Президент элдин эсебинен, жалпы республикалык бюджеттен төлөнө турган береселерге да токтолгон. Бул мезгилге чейин чогулган 5 миллиард доллар сырткы карыз 2035-жылга чейин төлөнөрүн кошумчалаган.
Тоо-кен өндүрүүчүлөр жана геологдор ассоциациясынын төрагасы, техникалык илимдердин доктору, академик Дүйшөнбек Камчыбеков Кыргызстанда кен казууда приоритеттүү гана кенди алууга басым жасалышы керектигин айтты. Кыргызстандын аймагы кен байлыктарга бай. Бирок анын баарын эле каза бербей колдонуунун атайын программасын же стратегиялык документти иштеп чыгуу керекАнын айтымында, дүйнөлүк рынокто полиметалл, сейрек кездешүүчү металлдарга талап жогору болгондуктан, аларды иштетүүнүн жолдорун да карап көрүү керек. Ошондой эле адис тоо кен тармагынын өлкө экономикасындагы орду чоң болгону менен учурда экология маселесине да дыкат көңүл буруу керектигин кошумчалады.
Антальядагы асма жолдун кабинасы кулаганда жабыркаган кыргызстандык аял ооруканага тик учак менен жеткирилди. Бул тууралуу Кыргызстандын Тышкы иштер министрлиги кабарлады. Маалыматта мекендештин далы жана буттары көгөргөнү, ооруканага жаткырылганы айтылды. Кыргызстандын консулдугунун кызматкерлери аялдын ал-абалынан кабар алып келишкенин билдиришти. Эске салсак, буга чейин Антальяда асма жолдун кабинасы бийиктен кулап, бир адам каза болгону, жети адам жабыркаганы айтылган. Кырсыктын себеби азырынча белгисиз.
Жаңылыктар түрмөгү
0