Күнүмдүк жаңылыктар 15:00

Күнүмдүк жаңылыктар 15:00
Жазылуу
Азыр күчтүү кадрлар жетишпей жатат. Сынчылар көп, колдорунан иш келбейт. Бул тууралуу президент Садыр Жапаров "Кабар" агенттигине берген маегинде билдирген.Мамлекет башчы журналисттин "Мекенчил" партиясынын өкүлдөрү кармалганы боюнча суроосуна комментарий берип жатып, мамлекеттик кызматкерлердин кимиси кандай иштеп жатканы ага даана көрүнүп турганына токтолгон.Ал эл, мамлекет үчүн күн-түн дебей кара жанын карч уруп иштеп берген кызматкерлерди колдой турганын белгилеп, ар кимди кызматтан алууну сунуштай берүүнү токтотуу керектигин кармалгандарга эскерткенин кошумчалаган.
Кыргызстанга Казакстандын премьер-министри Олжас Бектенов жумушчу сапары менен келди. Бул тууралуу министрлер кабинети билдирди. Бектеновду "Манас" эл аралык аэропортунан өкмөт башчынын биринчи орун басары Адылбек Касымалиев тосуп алды. "Сапардын алкагында Акылбек Жапаров менен Олжас Бектеновдун ортосунда сүйлөшүүлөр жүргүзүлөрү пландалууда. Тараптар кыргыз-казак кызматташтыгын талкуулашат", — деп айтылат маалыматта. Белгилей кетсек, Олжас Бектеновдун өкмөтү февраль айынын башында куралган. Бул анын премьер-министр катары чет өлкөгө жасаган алгачкы жумушчу сапары.
Министрлер кабинетинин төрагасы Акылбек Жапаров энергиянын кайра жаралуучу булактары жаатындагы айрым чечимдерге өзгөртүүлөрдү киргизүү боюнча токтомго кол койду. Бул тууралуу өкмөттүн маалымат кызматы кабарлады.Ага ылайык, документ энергияны кайра жаралуучу булактардан алууну өнүктүрүү, ошондой эле жаңы кубаттуулуктарды ишке киргизүү максатында иштелип чыккан.Эми кайра жаралуучу булактардан энергия алган станцияларын куруу үчүн жерди ижарага берүүнүн мөөнөтү 5 жылдан 25 жылга узарды.Жер участогун алгандан кийин үч айдын ичинде кайра жаралуучу булактардан энергия алган станциянын долбоору даяр болбосо, алты айдын ичинде долбоорду ишке ашыруу үчүн алдын ала техникалык-экономикалык негиздеме жана ырасталган каржылоо булагы жок болсо жана бир жылдын ичинде курулуш иштери башталбаса ижарага берилген жерди кайтаруу шарттары белгиленген.
Кыргыз киносунун тарыхында биринчи жолу Руслан Акун тарткан "Бейиш эненин таманында" тасмасы 11-апрелден тарта Россияда кеңири прокатка чыгат. Бул тууралуу Маданият, маалымат, спорт жана жаштар саясаты министрлиги билдирди.Ага ылайык, фильмди Голливуд тасмаларын "сүйлөткөн" россиялык саунд-актерлор коштогон. Аталган кино психикалык өнүгүүсү артта калган 35 жаштагы адамдын жана анын 75теги апасынын Меккеге сапарын баяндайт. Тасма Кыргызстандан тышкары Өзбекстанда, Казакстанда, Түркияда, Египетте жана Сауд Араб өлкөсүндө тартылган. Кино Казакстанда 21-мартта прокатка чыкса, Өзбекстанда 11-апрелде чыгат. Ошондой эле тасманы түрк жана араб тилдерине которуу пландалып жатканы кошумчаланды.
Казакстан менен Россиянын бир катар аймактарындагы суу каптоолор материалдык зыяндан сырткары, адам өмүрүнө да кооптуулук жаратууда. РИА Новости ӨКМге таянып Курган жана Тюмень облустарында кырдаал кыйын болуп жатканын жазды. Ал жакта куткаруучулар тобунун иштери арбып, өзгөчө кырдаалдар боюнча ведомствосу күчөтүлгөн тартип менен иштеп жатышат. Министр Александр Куренков абал кыйындаган аймактарды кыдырып жүргөнүн билдиришти.Оренбург облусунда 10 миңге жакын үйдү суу каптаган, Орск аймагында 2 500гө чукул киши коопсуз жайга көчүрүлүп, психологдор да иштеп жатканы айтылды. Кайгуул кызматтары мародерчулуктун алдын алуу үчүн байкоо салып жүргөнүн билдиришти. Ал эми Казакстандын ӨКМи бул күндөрү Акмоло, Караганда, Актөбө, Атырау, Батыш-Казакстан, Костанай, Павлодар, Түндүк-Казакстан облустарында суу ташкындын кесепетин жоюу иштери уланып жатканын билдирди.
Жаңылыктар түрмөгү
0