Мамытов: идеологиянын экономикага тийгизген таасири чоң
© Sputnik / Асель Сыдыкова
Жазылуу
Мамлекеттик башкаруу академиясынын жаңы экономика боюнча илим-изилдөө кафедрасынын жетекчиси, экономист Улукман Мамытов идеологиянын экономикага таасирин айтып берди.
Мамлекеттин идеологиясы анын экономикасына түздөн-түз таасир этет. Идеологиялык багыты аныкталмайын, өлкө токтоп турган кемедей кайсы тарапка карап өнүгүшү керектигин билбейт. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Мамытов: идеологиянын экономикага тийгизген таасири чоң
Анын айтымында, учурда Кыргызстан тандап алган идеологиясыз багыт же неолиберализм идеологиясы туура эмес багыт экенин көрсөттү.
"Советтер Союзу ураган соң Кыргызстан эгемендигин жарыялап, экономикалык багытын рыноктук же болбосо либералдык экономиканы тандап алды. Ошону менен бирге эле так, белгиленген идеологиясы жок экенин көрсөттү. Мунун өзү Кыргызстандын неолиберализмде баратканы эле. Тактап айтканда, белгилүү идеологиясы жок, бардык идеологияларга уруксат берген неолиберализм 30 жылдан бери өлкөбүздө өкүм сүрүп келет. Бирок неолиберализмге каршы көптөгөн көз караштар бар. Бул ошол эле салттуу динди кармангандар, экономикалык жактан алып караганда, социалисттер мындай багыты жок идеологияга каршы. Анткени адам табиятына каршы келген нерселерге жол берип, акчасы көп тарап жеңет деген эреже менен жашайт. Мындай көз караш коомго туура келбей турганын учурда өзгөчө байкап жатабыз. Демек, дүйнө өзгөрүп жаткан доордо Кыргызстан да өзүнүн идеологиялык багытын аныктап, ал тууралуу ачык жарыялашы зарыл", — деди Мамытов.
Ал өлкөдө мекенчилдерди өстүрүү менен кыргыз коомуна туура келген идеологияны калыптандырса болорун кошумчалады.
