Касмамбетов: кыргыздын идеологиясы — наркында
Жазылуу
Мамлекеттик катчы Сүйүнбек Касмамбетов кыргыздын наркы анын идеологиясы болуп келгенин айтты.
Дүйнөдө ушул күнгө чейин наркын сактап келе жаткан 5-6 эле улут болсо, анын бири — кыргыздар. Ошол үчүн да миңдеген жылдык тарыхты куруп, өзүн сактап кала алган. Мындай пикирин Сүйүнбек Касмамбетов Sputnik Кыргызстан радиосуна маек куруп жатып билдирди.
Касмамбетов: кыргыздын идеологиясы — наркында
Анын айтымында, эгемендүүлүк алган жылдардан тарта өлкөдө идеологиялык боштук пайда болду деш — жаңылыш түшүнүк.
"Чоң өлкөнүн курамынан чыгып, өз алдыбызча күн көрө баштаган учурубуз санариптешүү доору менен тогошуп, натыйжада укук маселеси алдыга чыкты. Нарк-насилге сугарылып, кылымдар бою өзүнүн жазылбаган мыйзамдары менен жашаган биз сыяктуу чакан улут үчүн "салтты кандай кылабыз, укукту эмне кылабыз" деген суроо жаралды. Мына ушул маалда элдин башын бура турган идеология жок, боштук пайда болду деп айтып жүргөндөр да бар. Бирок миңдеген жылдык тарыхы бар кыргыз жашоосунда эч качан идеологиясы жок заман болгон эмес. Жөн гана убактылуу акча табууга, чайкоочулукка берилип, кара курсак маселесин алдыга коюп жашаган күндөрдү башыбыздан кечирдик. Бирок кыргыз эч убакта наркын унутуп, наркын жоготуп алган эмес. Улуттун улуу наркы кыргыздын Конституциясынын ордун басып келген "Манас" эпосунда сакталган. Атадан балага, энеден кызга өткөн наркында уюган. Ошондуктан да башка түрк элдеринин эскерүүлөрүнөн карасак, кыргыздарды "Енисейде эркелеп, Манасты курандай жаттаган эл. Алар абдан кенен жана айкөл, аркасынан бычак сайганды кучак жайып тосуп ала алган, көч үстүндө төрөлүп, ат үстүндө өлгөн, өз эркиндигин кылычтын мизи менен, найзанын учу менен ушул күнгө жеткирген эл" деп сүрөттөшөт. Мунун баары нарк эмей эмне", — деди Касмамбетов.
Ал техника өнүккөн заманда кыргыз наркын жаштарга туура жеткирүүгө басым жасоо зарылдыгын кошумчалады.
