Кайыпов: кыргыз жаштарынын ЕАЭБ сотунда иштөө мүмкүнчүлүгү бар

"Евразия экономикалык биримдигинин соту уюм түзүлгөндөн бери иш алып барып келет. Анда 10 судья болсо, экөөбүз Кыргызстандын өкүлдөрүбүз. Мен бирок азыр бул жерде кыргыз жаштарына кайрылгым келип турат. Анткени аталган соттун аппаратында бир дагы кыргызстандык кызматкер жок. Айлык маяна, негизи чыгымдардын 85 пайызы Россия Федерациясы тарабынан каржылангандыктан ЕАЭБ сотунун аппаратында да ушул өлкөдөн кызматкерлер көп болушу керек деген түшүнүк бар экен. Бирок бул жаңылыш пикир деп айтар элем. Анткени ЕАЭБдин соту Минск шаарында жайгашкандыктан ал жакка россиялык юристтер иштегени көп деле барышпайт. Алардын өздөрүндө айлык жакшы төлөнгөндүктөн кызыгуу солгун. Биздин сотто көбүнесе беларустук жаштар эмгектенүүдө. Ошол эле учурда ЕАЭБге мүчө беш мамлекеттен тең юристтер секретариатта иштөөгө укуктуу. Учурда бош орундар бар, конкурс жүрүүдө. Андыктан биздин кыргызстандык жаш юристтер да ЕАЭБ сотунун сайтына кирип, вакансия деген бөлүмүн толтуруп, керектүү документтерин жүктөп 7-мартка чейин сынакка катышуу мүмкүнчүлүгү бар. Документтери өтсө сүйлөшүү да видео аркылуу эле жүргүзүлөт, тактап айтканда, Минскиге келиштин кажети жок. Эгер андан да өтүп кетсе ЕАЭБ сотунун аппаратынын кызматкери болуп калат да, Минскиге келиши керек болот. Мындан сырткары, кийинки жылы аппаратта жетекчилик орундарга сынак жарыяланат. Ага да татыктуулар азыртадан даярдана беришсин", — деди Кайыпов.