Министрлик: майыптар үчүн бөлүнгөн 1 429 иш орундун 106сы гана колдонулду
© Sputnik / Шабдан Абылгазы уулу
Жазылуу
Эмгек, социалдык камсыздоо жана миграция министрлигинин иш менен камсыз кылууга көмөктөшүү бөлүмүнүн башчысы Наргиза Туркебекова майыптарды ишке орноштуруу боюнча жасалган иштер тууралуу айтып берди.
Былтыр майыптар үчүн жумуш орундарына 1 429 квота бөлүнүп, анын 106сына гана колдонулганын Наргиза Туркебекова Sputnik Кыргызстан радиосунда маек куруп жатып билдирди.
Министрлик: майыптар үчүн бөлүнгөн 1 429 иш орундун 106сы гана колдонулду
Анын айтымында, бул майыптар үчүн иш берүүчүлөр маянасы аз иш орундарын сунуштаганы менен байланыштуу.
"Ден соолугунан мүмкүнчүлүгү чектелген жарандарды иш менен камсыз кылуу көйгөйлүү маселелерди бири болуп эсептелет. Майыптарды эмгек рыногуна интеграциялоо боюнча көптөгөн мыйзамдар бар. Эмгек кодексинин 314, 315-беренелерине ылайык, эмгек жамааты 20 адамдан ашса беш пайызын майыптарга квота катары бөлүп бериши шарт. Тилекке каршы, бул норма толук кандуу сакталбай келе жатат. Мисалы, 2023-жылы республика боюнча 1 429 квота бекитилсе, анын 106сы гана колдонулду. Анткени иш берүүчүлөр адатта квалификацияны талап кылбаган орундарды сунуштайт, алардын айлыгы жакшы эмес. Мындан тышкары, иштөөгө ылайыктуу шарттардын, ошол эле пандустардын, майыптарга ылайыктуу отура турган столунун жоктугу дагы тоскоол жаратат. Мындан тышкары, коомдук транспорт менен жумушка барып келүү шартынын татаалдыгы дагы өз кедергисин тийгизбей койбойт. Ошондой эле майыптардын квалификациясы жок болуп калууда. Ошентсе дагы квотадан тышкаркы кесиптерге талдоо жүргүзүлүп, ишке орноштуруу аракеттери көрүлөт. Натыйжада былтыр 292 жаран ишке орноштурулган. Мындан тышкары, көптөрүнүн кесиби, айрым учурда орто билими да жок болуп калат. Ошондуктан министрлик кыска мөөнөттүү курстарды сунуштап, былтыр 189 жаран окутулуп, алардын 62 пайызы иш менен камсыздалды", — деди Туркебекова.
Ошондой эле ал аралыктан ишке орноштуруу максатында майыптар үчүн онлайн-курстар уюштурулуп жатканын кошумчалады.
