Эртең калаада балдар адабиятына арналган "Кичинекей окурман" фестивалы өтөт
© Sputnik / Асель Сыдыкова
Жазылуу
"Акбарак" коомдук фондунун директору Уулжан Бектурова бөбөктөргө арналган кыргыз тилдүү адабиятты көтөрүү зарылдыгын айтты.
"Кичинекей окурман" фестивалын өткөрүү үчүн мамлекеттик сынак жарыяланып, жыйынтыгында "Акбарак" коомдук фонду жеңүүчү деп табылган. Маданият министрлиги фестивалды өткөрүү үчүн фондго каражат бөлүп берди. Бул тууралуу Уулжан Бектурова Sputnik Кыргызстан радиосунун эфиринде маек куруп жатып билдирди.
Эртең калаада балдар адабиятына арналган "Кичинекей окурман" фестивалы өтөт
Анын айтымында, аталган иш-чара бөбөктөргө арналган кыргыз тилдүү адабияттарды илгерилетүүгө багытталган.
"Ушул жекшемби, 18-февралда, Бишкек шаарында балдар адабиятына арналган "Кичинекей окурман" фестивалы өтөт. Максаты — балдарды китеп окууга кызыктыруу, бала менен бирге китеп окуунун маанилүүлүгүн көрсөтүү жана баланы интеллектуалдык жактан өнүктүрүү болуп саналат. Иш-чаранын алкагында бир катар тема боюнча талкуу аянтчалары түзүлөт. Анда балдар азыр кандай китептерди окуп жатышат, балдар менен китеп окуу эмне үчүн маанилүү, балдар үчүн сапаттуу материалдар даярдалганбы деген сыяктуу маселелер көтөрүлөт. Өлкөдө балдарга арналган кыргыз тилдүү адабият жокко эсе, жазмакерлер саналуу эле. Айрым чыгармалар чет тилден кыргызчага которулганы менен сапаты жакшы болбой жатат. Ошондуктан бул иш-чара бөбөктөргө арналган кыргыз тилдүү адабиятты көтөрүүгө багытталды. Фестивалдын алкагында балдар үчүн китептердин чоң көргөзмөсү, мастер-класстар, жомок жана кыргыз, англис тилдеринде китеп окуу сааттары өтөт. Фестиваль Чыңгыз Айтматов проспекти, 1/1 дарегиндеги "Сейтек STEM" мектебинде саат 10:30да башталып, 16:00гө чейин уланат", — деди Бектурова.
Ал коомдун өзгөрүшү менен балдарга арналган чыгармалар да өзгөрүп, комикс, манга сыяктуу китептер басылып чыгышы керектигин кошумчалады.
