Мамытов: экономиканын жаңы моделине өтүүгө убакыт келди
© Sputnik / Асель Сыдыкова
Жазылуу
Мамлекеттик башкаруу академиясынын жаңы экономика боюнча илим-изилдөө кафедрасынын жетекчиси, экономист Улукман Мамытов экономика саясаттан көз каранды болгондуктан, дүйнөдө болуп жаткан геосаясий окуялар экономиканын жаңы моделин түзүүнү шарттайт деп эсептейт.
Экономиканын жаңы моделине өтүү мезгили келип жетти. Кыргызстан бул багыттагы кадамдарын азыртадан башташы керек. Мындай пикирин Улукман Мамытов Sputnik Кыргызстан радиосуна маек куруп жатып билдирди.
Мамытов: экономиканын жаңы моделине өтүүгө убакыт келди
Анын айтымында, өлкөнүн экономикасын көтөрүү үчүн жаңы стратегиялык пландарды түзүп, пландык экономика моделин колдонуу шарт.
"Геосаясатка байланыштуу дүйнөлүк экономикада да ири өзгөрүүлөр болууда. Азыр биз жашап жаткан экономика модели болгон рыноктук же либералдык экономика системасы бизге окшогон өлкөлөргө туура келбей турганын түшүнүп калдык. Андыктан 5-6 жылдын ичинде дүйнөлүк экономика башка системага өтүп каларын айрым серепчилер да болжолдошууда. Батыш өзү түзгөн экономикалык моделинен өзү да жабыркап жатат. Бүгүнкү система менен Кыргызстан өз технологиясын өнүктүрбөй эле базардын артынан ээрчип баратат. Демек, глобалдык атаандаштыкка даяр эмеспиз. Азыркы экономикалык моделде макроэкономикалык көрсөткүчтүн эң чоң балансы — соода. Биздин соода балансыбыз болсо дайыма эле негативдүү. Импорт көп, экспорт аз. Башка мамлекеттер алтынын сары майдай сактап жатса, биз аны сатуудабыз. Муну менен катар көп киреше алып келбеген чийки заттарды гана экспорттойбуз. Өндүрүш жокко эсе. Мигранттардан түшкөн акчага башкалардын өндүрүшүнөн чыккан компьютер, телефон, унаа өңдүү технологияларды сатып алабыз. Мындай жол менен кайда барарыбыз белгисиз. Ошол себептен жаңы стратегияларды алып келип, жок дегенде соода балансын тууралашыбыз керек. Рыноктук экономика бизге окшогон мамлекеттерге жарабайт экен. Анткени импортко көз карандылык күчөйт. Кыргызстандын келечегин ойлосок коркпой эле жаңы экономика тууралуу айтып, жаңы секирикке даярдануу керек", — деди Мамытов.
Ал өлкөдөн жылына эки миллиардан ашык доллардын чыгып жатышын терс көрүнүш катары баалады.
