Бишкек шаардык кеңешиндеги депутаттардын саны 235ке чейин көбөйөт
© Sputnik / Шабдан Абылгазы уулу
Жазылуу
Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиктин жергиликтүү өз алдынча башкаруу башкармалыгынын башчысы Мыктыбек Өмүрзаков административдик-аймактык реформа жүргүзүүдөгү айрым көйгөйлөр тууралуу айтып берди.
Бишкек шаардык кеңешинин депутаттарынын саны 45тен 235ке чейин көбөйөт. Бул тууралуу Мыктыбек Өмүрзаков Sputnik Кыргызстан радиосунда маек куруп жатып билдирди.
Бишкек шаардык кеңешиндеги депутаттардын саны 235ке чейин көбөйөт
Анын айтымында, мындай өзгөрүүгө административдик-аймактык реформадан улам барууга туура келет.
"Административдик-аймактык реформа жүргүзүүдөгү көйгөйлөр уюштуруу иштеринде кездешүүдө. Жергиликтүү кеңештер бириктирилип жатат, алардын 90 пайыздан ашыгынын мөөнөтү 2025-жылдын апрелинде бүтөт. Ошол мөөнөт бүткөнгө чейин иштесин деген чечим кабыл алынууда. Натыйжада Бишкек шаарына сегиз айыл аймак кошулгандан кийин депутаттардын саны 45тен 235ке көбөйүүдө. Мынча депутат менен маселени чечүү татаал, анын үстүнө кошула турган депутаттар айылдык кеңештики. Ошондуктан борбор калаанын бюджетин бекитүү мерияга берилүүдө. Буга чейин калаанын бюджетин шаардык кеңеш бекитип келген. Ош шаарында деле ушундай абал, депутаттардын саны эки эсеге көбөйөт. Буга чейин Түптө, Нарында жергиликтүү кеңештердин иши президенттин 87-жарлыгы менен жөнгө салынган. Аталган жарлык айыл аймактардын деңгээлинде гана каралган. Реформанын бул баскычында шаарлар дагы кошулгандыктан президенттин жарлыгы менен убактылуу жобо бекитилиши зарыл. Учурда процесс жүрүп жатат. Бириккен айыл аймактарында апрелге чейин төрагалар шайланып бүтүшү керек. Алар ошол бириккен айылдык кеңештердин төрагаларынын арасынан гана тандалат. Ал эми шаардык кеңештердин төрагалары өз ордунда кала берет. Ошондой эле айылдык кеңештер бөлүнгөн учурда дагы айрым оорчулуктар жаралууда. Маселен, Таш-Көмүр шаарынан Шамалды-Сай бөлүндү. Таш-Көмүрдө 31 депутат болсо, анын 10у Шамалды-Сайдан шайланган. Ошолорду бөлүп чыгып, өзүнчө кеңеш түзүү чечими кабыл алынууда", — деди Өмүрзаков.
Ошондой эле ал башка шаардык кеңештерде дагы ушундай абал болуп жатканын кошумчалады.
