Боксчу Мамакеев: олимпиадалык кыялым орундалбай калды
© Sputnik / Асылбек Бактыбеков
Жазылуу
Бокс боюнча Кыргызстандын көп жолку чемпиону, эл аралык мелдештердин жеңүүчүсү, машыктыруучу Медер Мамакеев өлкөнүн күчтүү боксчуларынын көбү учурда машыктыруучулукту аркалап, өспүрүмдөрдү мелдештерге даярдай баштагынын айтты.
Өзүм машыктырган спортчу балдарды Олимпиада оюндарына даярдап, жыйынтык көрсөтүүгө болгон күчүмдү жумшайм. Бул тууралуу Медер Мамакеев Sputnik Кыргызстан радиосунун эфиринде маек куруп жатып билдирди.
Боксчу Мамакеев: олимпиадалык кыялым орундалбай калды
Анын айтымында, кыргыз боксунда шарттын жоктугуна карабай кыйын мезгилде машыгып, эл аралык мелдештерде жетишкендиктер көп болду.
"Ысык-Көлдүн Маман деген айылында төрөлүп-өсүп, чоң спортко карай жол ошол киндик кан тамган жерден башталган. Жанар, Назар аттуу агаларымды бокс менен алектенгенин көрүп, кызыгуу башталган. Айылда бокс залы жок болгондуктан Каракол шаарына барууга туура келчү. Үйдөн залга чейин 5-6 чакырым эле. Шаардагы "Алга" деп аталган бокс залына барып, Тилекмат Энкеев деген Кыргызстандын эмгек сиңирген машыктыруучусунун колунда тарбияландым. Акырындык менен спорттун кыйынчылыктарын жеңип, республикалык, кийин эл аралык турнирлерге чыга баштадым. Республиканын биринчилигин жеңип, курама командага кошулуп, өлкө намысын коргоп, чет өлкөлөргө чыгып колдон келген аракетти көрдүм. Бокс аркылуу кадыр таап, өзүмдү тарбиялай алдым. Спортчу катары карьерамды жыйынтыктагандан кийин машыктыруучу болуп балдарга тажрыйбамды бөлүшүп келем. Өзүм машыктырган спортчу балдарды Олимпиада оюндарына даярдап, жыйынтык көрсөтүүгө болгон күчүмдү жумшайм. Чогуу рингде беттешип жүргөн Азат Үсөналиев, Өмүрбек Малабеков, Эрмек Сакенов да азыр машыктыруучу болушту. Буюрса, алар мыкты муунду тарбиялайт деп ишенем. Тилекке каршы, менин олимпиадалык кыялым орундалбай калды", — деди Мамакеев.
Ошондой эле ал мамлекет бокс залдарын ачып машыктыруучулар, спортчулар үчүн шарт түзүп берип турса сөзсүз Олимпиада, дүйнө чемпиондорун чыгарууга болорун кошумчалады.
