Жумалиев: авиация кызматкерлеринин квалификациясын көтөрүү зарыл
© Sputnik / Асель Сыдыкова
Жазылуу
Мамлекеттик жарандык авиация агенттигинин укуктук колдоо жана кадрдык иш бөлүмүнүн башчысы Бектур Жумалиев авиация кызматкерлеринин квалификациясын жогорулатуу талабы курч турганын айтты.
Кыргыз авиациясынын сапатын жогорулатуу үчүн биринчи кезекте каражат керек. Мындай пикирин Бектур Жумалиев Sputnik Кыргызстан радиосуна маек куруп жатып билдирди.
Жумалиев: авиация кызматкерлеринин квалификациясын көтөрүү зарыл
Анын айтымында, жарандык авиациянын кызматкерлерин эл аралык стандарттарга шайкеш келген окутуулардан өткөрүү зарыл.
"Кыргызстандын авивция тармагы Евробиримдиктин кара тизмесине 2006-жылы кирген. Ошондон бери чыга элек. 2023-жылдын сентябрь айында атайын аудиторлор келип Кыргыз жарандык авиациясынын ишмердүүлүгүнө аудит жасап кетишти. Анда биз өтө жогору болбосо да 80 пайыздык көрсөткүчкө ээ болдук. Эл аралык стандарттардын негизинде алып караганда, бул жакшы эле көрсөткүч. Башкача айтканда, кара тизмеден чыгууга жасалган дагы бир ийгиликтүү кадам катары бааласак болот. Евробиримдиктин кара тизмесинен чыгып, дегеле авиация багытында ийгиликтүү иш алып баралы десек, биринчи кезекте кызматкерлерибиздин квалификациясын жогорулатуу зарыл. Аларды заманбап талаптарга шайкеш келген билимдерге ээ кылуу зарылчылыгы курч турат. Ал үчүн эл аралык деңгээлдеги сертификаттарды берген компаниялардан адистерди чакырып же биздикилерди ал жакка жиберип окутуулардан өткөрүү керек. Буга аз эмес каражат кетет. 2024-жылы ушул тармакты өнүктүрүүгө басым жасалат", — деди Жумалиев.
Ал аймактык аэропорттордун реконструкцияланышы да кыргыз авиациясынын сапатын көтөрөрүн кошумчалады.
