Абакиров: ишкерлерге берилген кепилдик 3 млрд. сомдон ашары күтүлүүдө
© Sputnik / Шабдан Абылгазы уулу
Жазылуу
"Кепилдик фонд" ачык акционердик коомунун төрагасы Малик-Айдар Абакиров ишкерлер насыя алганда күрөөнүн баасы аз болуп калса, кепилдик берилерин белгиледи.
Быйыл ишкерлерге берилген кепилдиктердин суммасы үч миллиард сомдон ашары күтүлүүдө. Бул тууралуу Малик-Айдар Абакиров Sputnik Кыргызстан радиосунда маек куруп жатып билдирди.
Абакиров: ишкерлерге берилген кепилдик 3 млрд. сомдон ашары күтүлүүдө
Анын айтымында, "Кепилдик фонд" ишкерлерге жардам берүү максатында 2016-жылы түзүлгөн.
"Былтыр 1043 ишкерге кепилдик берилсе, быйыл бул сан 4200гө жетти. Башкача айтканда, өткөн жылга салыштырмалуу төрт эсеге көп болду. Берилген кепилдиктин жалпы суммасы былтыр 1 миллиард 848 миллион сом болсо, учурда 2 миллиард 700 миллион сомго чамалап барды. Жыл этегине чейин бул көрсөткүч үч миллиард сомдон ашары күтүлүүдө. Бул сумманын 65-70 пайызы региондорго кетти, быйыл кепилдик берилген ишкерлердин 82 пайызы да аймактарда. Кепилдик берүү инструменттери жыл санап көбөйүүдө. Алсак, былтыр мыйзамга өзгөртүүлөр киргизилип, портфелдик система каралган. Мурда кепилдик берүү үчүн документтер 3-7 күн каралса, учурда өнөктөш банктар жибергенде эле кепилдик берилүүдө. Бул үчүн былтыр Дүйнөлүк банктан 32 миллион доллар бөлүнүп, 21 миллион доллары алынды. Кийинки жылы бул долбоор жыйынтыкталып калат. Мындан тышкары, ипотека алууга дагы кепилдик берилүүдө. МИКтин эки долбоору бар. Биринчисинде мамлекеттик кызматкерлерге баштапкы салымы 10 пайыз, үстөгү 4 пайыз менен берилет. Экинчиси бардык каалоочуларга 8 пайыз үстөгү, 20 пайыз баштапкы төлөмү менен сунушталууда. Учурда 100дөн ашуун жаранга 27 миллион сомго кепилдик берилди. Кепилдикти алуу үчүн жарандар, ишкерлер банкка кайрылат. Күрөөнүн суммасы тийиштүү акчаны алууга жетпей жатса, банк кызматкерлери кепилдик алууну сунуш кылат", — деди Абакиров.
Ошондой эле ал ислам принциптери менен кепилдик берүү колго алынып жатканын кошумчалады.
