Ата-эне балага жыныстык тарбияны кантип бериши керек? Адистин кеңеши

"Акыркы учурда жаш кыздар баласын төрөп таштап кеткен окуялар көп болуп, коомдо нааразычылыкты жаратууда. Бул абдан көйгөйлүү маселе. Совет мезгилинде мектептерде атайын өспүрүмдөр кабинети иштеп, адистер тарабынан консультация берилчү. Тилекке каршы, биз эми гана ушундай чара көрүш керек деп кыймылдай баштадык. Чынын айтканда, азыр "14 жаштагы кыз боюнда болуп, төрөптүр" деген кабарга эч ким таӊ калбай калды. Мен өзүм төрөт үйүндө иштегендиктен 14-15 жаштагы кыздардын көз жарганына көп эле күбө болуп жатам. Эмне үчүн мындай көрүнүштөр арбыды? Себеби азыр сырткы миграция өсүп, кыз балдар ата-энесинин кароосу жок калууда. Эркин жүргөн өспүрүмдөр интернеттен түрдүү нерселерди көрүп, өз билгенин жасоодо. Мунун баары эрте жыныстык катнашка барууга түрткү болот. Ата-энелер көбүнчө балдары менен репродуктивдүү ден соолук, жыныстык жол менен жугуучу оорулар, организмде болуп жаткан өзгөрүүлөр, өздөрүнүн чек арасы жана коопсуздук темаларын кантип талкуулоону билишпейт. Анткени алар менен да бул темада эч ким сүйлөшкөн эмес. Ошондуктан азыр мындай маселелерди талкуулоодон уялабыз. Жыныстык тарбия — бул толук кабыл алуу, максималдуу колдоо жана бала менен ишенимдүү мамиле. Ата-эненин милдети күн сайын өспүрүмгө аны ар дайым колдой турганын, ал кандай гана маселе болбосун кайрыла ала турганын жана кыйкырбай, күнөөлөп, жазалабай түшүнүү менен мамиле кыларын айтып туруу керек. Өспүрүмдөрдүн коопсуздугун камсыздоону үй-бүлөдөгү тыгыз жана ишенимдүү мамиле өбөлгөлөйт", — деди Жалиева.