Беков: ECO TAXI кызматында иштеп күнүнө 4 000 сом тапса болот
© Sputnik / Асел Акмат
Жазылуу
Муниципалдык ECO TAXI кызматынын жетекчиси Рамил Беков аталган кызматта иштеген айдоочулар үчүн артыкчылыктар көп экендигин айтты.
2024-жылга чейин муниципалдык ECO TAXI кызматына дагы 200 электр кубаты менен жүргөн унаа кошулат. Бул тууралуу Рамил Беков Sputnik Кыргызстан радиосунун эфиринде маек куруп жатып билдирди.
Беков: ECO TAXI кызматында иштеп күнүнө 4 000 сом тапса болот
Анын айтымында, октябрь-ноябрь айларында 100 унаанын келиши күтүлүүдө.
"Азыркы кезде электр кубаты менен жүргөн 10 автоунаа иштеп жатат. Октябрь-ноябрь айларында 100 унааны, ал эми жыл соңуна чейин жалпы 200 унааны алып келүүнү пландап жатабыз. Муниципалдык ECO TAXI кызматында иштеп, ошол унаанын айдоочу өзүнө өткөрүп алса болот. Бүгүнкү күндө көпчүлүктүн дароо сатып алууга мүмкүнчүлүгү жок болгондуктан, жарандарга ыңгайлуу болсун деп бул нерсени иштеп чыктык. Күнүнө ижарага унаа алгандар шаарыбызда миңдеп саналат. Алар биз менен иштешсе 11 миң долларлык унааны ай сайын 1000 доллардан төлөсө, дээрлик бир жылда электр кубаты менен жүргөн унаа өзүнүкү болуп калып жатат. Жаңыдан иштеп баштаган таксилер бир күндө 100дөй кишини ташууда. Ар биринен 50 сомдон алганда 5000 сом болот. Анын 600 сому унааны кубаттаганга кетет. Ал эми 400 сомун тамак-ашка коротсо, колуна таза 4000 сомдой акча калат. Күндө анын 2500-3000 сомун унааны сатып алууга берсе, унаа ар бир айдоочунун өзүндө калганы турат. Азыркы кезде башка такси кызматында иштегендер да бизге кайрылууда. Анткени бул таксилерге сары тилке менен жүрүүгө уруксат. Башка унаалардай болуп, жол тыгынында турбайт. Ошондой эле алар, эң маанилүүсү, экологияны сактап калууга салым кошот", — деди Беков.
Ал аталган кызмат кийинчерээк жеткирүү кызматын да ишке ашырарын кошумчалады.
