ЕАЭБ алкагында бирдиктүү биржа түзүү мерчемделүүдө
10:23 27.09.2023 (Жаңыртылды: 10:40 27.09.2023)
© Sputnik / Асел Акмат
Жазылуу
Кыргыз фондулук биржасынын президенти Медет Назаралиев ЕАЭБ алкагында бирдиктүү биржа рыногун түзүү аракеттери тууралуу айтып берди.
ЕАЭБ алкагында бирдиктүү баалуу кагаздар жана товардык биржа түзүү максатталууда. Бул тууралуу Медет Назаралиев Sputnik Кыргызстан радиосунда маек куруп жатып билдирди.
ЕАЭБ алкагында бирдиктүү биржа түзүү мерчемделүүдө
Анын айтымында, бул багытта ЕЭК иш алып барууда.
"ЕАЭБ алкагында бирдиктүү баалуу кагаздар рыногун өнүктүрүү мерчемделүүдө. Ал уюмга мүчө-мамлекеттердин фондулук биржаларынын тыгыз иш алып баруусу аркылуу ишке ашат. Маселен, учурда Кыргызстандын компаниясы Кыргыз фондулук биржанын листинг тизмесине кирсе уюмга мүчө-өлкөлөрдүн биржасына чыга алат. Учурда Казакстан, Россиянын компаниялары Кыргыз фондулук биржасына чыга турган болсо, мамлекеттик финансылык көзөмөл тарабынан балуу кагаздарын каттоодон өткөрүп, анан биржага чыгат. Бирдиктүү баалуу кагаздар рыногу түзүлсө бул процесс кыскарат. Мунун жакшы тарабы — компаниялар уюмдун алкагында инвестиция тарта алат. Ошондой эле Кыргыз фондулук биржага уюмга мүчө-мамлекеттердин компаниялары чыкса, жергиликтүү компаниялар инвестициясын көбөйтсө болот. Кыргызстандын биржа инфраструктурасын уюмга мүчө-мамлекеттердикине теңөө зарыл. Анткени айырма байкаларлык чоң. Мындан тышкары, бирдиктүү товардык биржа түзүү боюнча процесс жүрүүдө. Бул багытта бир нече сунуштар талкууланып жатат. Биржадан келишим түзүүдөн тартып, аны ээсине жеткиче коштоо боюнча иш алып баруу зарыл", — деди Назаралиев.
Ошондой эле ал Кыргызстанда айрым товарларды милдеттүү түрдө биржа аркылуу сатуу пландалып жатканын кошумчалады.
