УКМК: Кыргызстандан көмүрдү сыртка арзан баада саткандар кармалды
14:24 14.09.2023 (Жаңыртылды: 14:25 14.09.2023)
![Көмүр жүктө иштери. Архив Көмүр жүктө иштери. Архив - Sputnik Кыргызстан, 1920, 14.09.2023](https://sputnik.kg/img/07e5/0b/10/1054612147_0:0:3072:1728_1920x0_80_0_0_3899a1724938a352098ecf1333c29645.jpg)
© Sputnik / Александр Патрин
/ Жазылуу
Коррупциялык схемага жергиликтүү кеңештин депутаттары жана Сүлүктүнүн мурдагы эки мэри катышканы айтылды.
БИШКЕК, 14-сен. — Sputnik. Кыргызстандан көмүр мыйзамсыз түрдө сыртка арзан баада чыгарылып турган. Бул тууралуу УКМК билдирди.
Кылмыш-жаза кодексинин 336-беренеси ("Коррупция") боюнча иш козголду.
"Бул коррупциялык схеманы Сүлүктү шаарынын экс-мэри, жергиликтүү кеңештин депутаттары жана ишкерлер уюштурган. Анын натыйжасында өзгөчө ири өлчөмдөгү салык жана бажы төлөмдөрү бюджетке түшпөй калган. Бажы кызматынын маалыматы боюнча, жыл башынан бери Баткен районунун шахталарынан коңшу мамлекеттерге 318 миң тоннадан ашык көмүр экспорттолгон. Анын кесепетинен Кыргызстанда көмүрдүн баасы жогорулаган", — деп айтылат маалыматта.
Ыкчам-издөө иш-чаралары төмөнкү активдүү ишкердиктин субъектилеринде жүргүзүлдү:
"Ак-Булак Көмүр" ЖЧКсы – Сүлүктү шаарынын экс-мэри, жергиликтүү кеңештин депутаты, 1963-жылы туулган Х.А.Д.;
"Кен-Ордо" ЖЧКсы — Н.А.Б.;
"Нур" ЖЧКсы – А.Р.Э., Сүлүктү шаарынын экс-мэри, жергиликтүү кеңештин депутаты;
"Рио Групп" ЖЧКсы — А.И.Р.;
"Нуркен" ЖЧКсы — Ш.З.А.;
"Ахмад-Кен" ЖЧКсы — А.Б.А., Сүлүктү шаарынын жергиликтүү кеңешинин депутаты;
"Ормон" ЖЧКсы — К.А.Т.;
"Кен-Сити" ЖЧКсы – А.А.Х.;
"Сары-Челек Сүлүктү" ЖЧКсы — К.М.;
ошондой эле "Кызыл-Кыя – автожол", "Кызыл-Кыя – темир жол" көзөмөл-өткөрүү постторунда, бажы терминалында, Соода-өнөр жай палатасынын Баткен жана Ош филиалдары;
үч алмашуу бюросунда;
"Спорттук общактын" мүчөлөрүнүн жашаган жеринде;
алты коммерциялык уюмда.
Натыйжада журналдар, келишимдер, квитанциялар, видеокөзөмөл камераларынын дисктери алынган. Учурда кошумча изилденип, талдоо иштери жүрүп жатат.
"Экспорттук декларацияны даярдоо үчүн ишкердиктин субъектилери "МБанк" мобилдик тиркемеси аркылуу ортомчуларга 300 доллардан төлөп, андан кийин "Спорттук общактын" мүчөлөрүнө 1 миңден 2 миң сомго чейин берип Кыргызстандын аймагынан тоскоолдуксуз чыгып жүрүшкөнү аныкталды. Бажы кызматынын расмий маалыматы боюнча, 2023-жылдын 1-январынан 27-июлуна чейинки аралыкта Баткен облусундагы көмүр шахталарынан коңшу мамлекеттерге 318 миң тоннадан ашык ар кандай сорттогу көмүр экспорттолгон. Буга байланыштуу КРде көмүрдүн баасы жогорулаган", — деп айтылат маалыматта.
Кармалып, убактылуу кармоочу жайга киргизилгендер:
"Кызыл-Кыя — Автожол" көзөмөл-өткөрүү пунктунун текшерүү тобунун К.И.К. аттуу инспектору;
"Баткен" бажысынын "Кызыл-Кыя" темир жолунун материалдык-техникалык камсыздоо бөлүмүнүн С.у.К. аттуу инспектору;
Соода-өнөр жай палатасынын Баткен облустук бөлүмүнүн Б.Э.Ю. аттуу башчысы;
"Имамидинов Экспорт" ЖЧКсынын Т.К.И. аттуу жетекчиси;
"А.Б.Б." жеке ишкерликтин негиздөөчүсү.