Кожошев: дүйнөдөгү газдын бештен бир бөлүгү ЕАЭБ өлкөлөрүндө
© Sputnik / Асел Акмат
Жазылуу
ЕЭКтин энергетика жана инфраструктура боюнча министри Арзыбек Кожошев ЕАЭБ көлөмдүү, экономикалык ресурстарга бай, келечектүү уюм экенин билдирди.
Дүйнө жүзүндөгү газдын бештен бир бөлүгү Евразиялык экономикалык биримдикке мүчө өлкөлөрдө жайгашкан. Бул тууралуу Арзыбек Кожошев Sputnik Кыргызстан радиосуна маек куруп жатып билдирди.
Кожошев: дүйнөдөгү газдын бештен бир бөлүгү ЕАЭБ өлкөлөрүндө
Анын айтымында, аталган биримдиктин калкынын саны 184 миллионду түзөт.
"ЕАЭБ дүйнөдөгү бардык экономикалык уюмдардын эң жашы. Түзүлгөнүнө болгону 10 жыл болду. Эгер тарыхты алып карай турган болсок, учурдагы экономика эле эмес, саясий маселелерге да аралашып жаткан биримдиктер 1950-жылдары дал ушундай экономикалык уюм болуп түптөлгөн. Алар 1990-жылдардан соң, тактап айтканда, 40 жылдан кийин гана өнүгүү жолуна түшкөн. Салыштырмалуу ЕАЭБ абдан жаш биримдик. Ошентсе да анын потенциалы бийик. Анткени ресурстарга бай. Мисалы, Жер шарында канча газ болсо ошонун бештен бир бөлүгү ЕАЭБге мүчө мамлекеттерге туура келет. Ал эми дүйнөдөгү мунайдын жети пайызы, электр энергиясынын беш пайызы дал ушул уюмга карайт. Демек, ЕАЭБ рыногу көлөмдүү, ири ресурстарга бай, келечеги кең, интеграциялык биримдик", — деди Кожошев.
Ал ЕАЭБ территориясы боюнча дүйнө жүзүнүн 14 пайызын ээлерин кошумчалады.
