Куралбекова: №100 лицей — жумушчу электриктерди даярдаган жалгыз окуу жай
13:38 17.08.2023 (Жаңыртылды: 14:07 17.08.2023)
© Sputnik / Асел Акмат
Жазылуу
№100 кесиптик лицейдин директору Индира Куралбекова аталган окуу жай ушул жылдын 1-сентябрына чейин кабыл аларын айтты.
Лицей — жумушчу электриктерди окуткан жалгыз билим берүү мекемеси. Башка жогорку билим берген университеттерде факультеттер бар. Бирок алар инженердик деңгээлдеги адистерди окутуп чыгарышат. Ал эми электромонтер, электромонтажник, автомобилдерди оңдоп-түзөөчү слесарь жана электрогаз ширетүүчүлөрдү республика боюнча аталган лицей гана даярдайт. Бул тууралуу Индира Куралбекова Sputnik Кыргызстан радиосуна маек куруп жатып билдирди.
Куралбекова: №100 лицей — электриктерди даярдаган жалгыз окуу жай
Анын айтымында, лицей толугу менен бюджеттик негизде окутат.
"№100 кесиптик лицей 1942-жылы негизделген. Ошондон бери өлкөнүн электрик жумушчуларын даярдап келет. Биздин окуу жай 9-класстын жана 11-класстын базасында кабыл алат. Окутуу акысыз, тактап айтканда, бюджеттик негизде жүрөт. Кабыл алуу сынактарынан өткөн балдар жатакана, бир жолку ысык тамак менен камсыздалат. 9-классты бүтүп келгендер үч жыл билим алып, орто билим берүү аттестатына кошуп бир кесиптин ээси болуп чыгышат. Ал эми 11-класстын базасында келгендер бир жыл окушат. Учурда башка керектүү адистиктер боюнча да лицензия алууга камынып жатабыз. Ошондой эле келечекте жер алдындагы суулар менен үйдү жылытуучу, күндүн нурунан электр энергиясын алуу боюнча адистерди даярдоо пландарыбыз бар. Биздин бүтүрүүчүлөр үчүн тажрыйба өтүүгө мастерскойлорубуз иштейт. Мындан сырткары, дуалдык билим берүү системасынын алкагында өндүрүштүн өзүнө барып практикадан өтүү, келечекте ошол ишканада иштеп калуу мүмкүнчүлүктөрү каралган. Буга кошумча, бизде акы төлөп окуй турган кыска мөөнөттүү курстар бар", — деди Куралбекова.
Ал кыска мөөнөттүү окуу курстарына бардык жаштагы адамдар тапшыра аларын, анда чачтарач, тигүүчүлүк багыттары да каралганын кошумчалады.
