Бишкекте 59 миң пенсионер, 11 миң окуучу "Тулпар" картасын алды
© Sputnik / Асель Сыдыкова
Жазылуу
Бишкек мэриясынын транспорт маселелери боюнча департаментинин директорунун орун басары Нурбек Сагынбек уулу коомдук транспортту накталай эмес төлөмгө өткөрүү тууралуу айтып берди.
Шаардын 59 миңден ашуун пенсионери кызыл "Тулпар" картасы менен камсыздалган. Бул тууралуу Нурбек Сагынбек уулу Sputnik Кыргызстан радиосуна маек куруп жатып билдирди.
Бишкекте 59 миң пенсионер, 11 миң окуучу "Тулпар" картасын алды
Анын айтымында, бул жүргүнчүлөрдү коомдук транспортто накталай эмес төлөмгө өткөрүү үчүн даярдыктын алкагында жасалган.
"2019-жылы тендер жарыяланып, аны швейцариялык компания утуп алган. Натыйжада аталган компания менен Бишкек мэриясы тарабынан келишим түзүлүп, "Тулпар" долбоору ишке киргизилген. Келишимге ылайык, муниципалитет 300дөн кем эмес коомдук транспортту линияга чыгарууга тийиш эле. Жыл башында газ менен жүрүүчү 120 автобус келди. Жергиликтүү бюджеттин эсебинен жыл соңуна чейин газ менен жүрүүчү 500 автобус сатып алуу боюнча план коюлган. Анын 50сү 15-августка чейин келет. Муниципалитет келишимде көрсөтүлгөндөй 300 коомдук транспортту линияга чыгара алат. Ошондуктан автобус, троллейбустарды 20-августтан тарта накталай эмес төлөмгө өткөрүү боюнча буйрук чыкты. Жүргүнчүлөр беш ыкма менен жол кирени төлөй алышат. Бардык транспорт каражаттарында төлөм кабыл алуучу валидаторлор орнотулган. Учурда шаардын 59 миңден ашуун пенсионери кызыл "Тулпар" картасы менен камсыздалган. Мынданы тышкары, 11 миңден ашуун окуучунун жашыл түстөгү карталары бар. Эми Азия өнүктүрүү банкынын көмөгү менен 120 электробус алып келинип, тийиштүү инфраструктурасы түзүлөт. Ошондой эле Европа реконструкция банкынын жардамы менен газ менен жүргөн 124 автобус алып келинип, алар токтой турган жайлар оңдоп-түзөдөн өткөрүлөт. Булардын жарым каражаты грант", — деди Сагынбек уулу.
Ошондой эле ал жалпы 28 жаңы каттам даярдалганын кошумчалады.
