Кыргызстанда нотариустардын жоопкерчилиги күчөтүлдү
© Sputnik / Елена Яковлева
Жазылуу
Юстиция министринин орун басары Орозбек Сыдыков жеке нотариустун макамы мамлекеттик нотариустукуна теңдештирилгенин айтты.
Лицензия алып иштеп жаткан нотариус өзүнө тиешелүү бардык иштерди жасай алышы керек. "Андай документти мен билбейм, тигиге бар" деген эми болбойт. Ал үчүн лицензия аларда өтүүчү тест санариптешип, күчөтүлдү жана Нотариус палатасы тарабынан адистер үчүн стажировкадан өтүү шарттары түзүлөт. Бул тууралуу Орозбек Сыдыков Sputnik Кыргызстан радиосуна маек куруп жатып билдирди.
Кыргызстанда нотариустардын жоопкерчилиги күчөтүлдү
Анын айтымында, эми тигил же бул документти жасаарда нотариустун жардамчылары кол коюу процессине катыша албайт.
"Мыйзамга киргизилген өзгөртүүлөргө ылайык, жеке нотариустун макамы мамлекеттик нотариустукуна теңдештирилди. Муну менен катар эле жоопкерчилиги да күчөтүлдү. Алсак, мурдагыдай жардамчысын жумшап коюп отура албайт. Бир нотариус үч адамга чейин жардамчы ала алат, алар документтерди көктөө, даярдап берүү сыяктуу гана түз милдеттери менен чектелет. Документке кол коюу нотариустун өзүнүн милдетине киргизилет. Ошондой кол коюулар жана журналга тизмектөө санариптешип, электрондук таризде жүргүзүлөт. Мындан сырткары, мурда нотариуска карата кылмыш иши козголуп, бирок кыскарып кетсе ал кызматын уланта берчү. Тергөө учурунда гана четтетилип, кайра лицензиясы менен иш жүргүзүү мүмкүнчүлүгү бар эле. Азыр эгер нотариуска тигил же бул маселе боюнча кылмыш иши ачылса, ал иш кыскарып кеткен учурда да лицензиясы кайра кайтарылып берилбейт. Биз мындай кадамдар менен нотариалдык кызмат көрсөтүүнүн аброюн көтөрүп, коррупциялык механизмдерди чектөөгө аракет кылуудабыз", — деди Сыдыков.
Ал нотариус ардактуу кесипке айланышы зарылдыгын кошумчалады.
