Бактыгүл Мырзабек: биринчи кадамды жасоодон коркпогон адам ийгиликке жетет
© Sputnik / Асель Сыдыкова
Жазылуу
Инфопродюсер, маркетолог Бактыгүл Мырзабек билим алуу, квалификацияны жогорулатуу аркылуу ийгилик жаратууга болорун айтты.
Кесиби боюнча финансист Бактыгүл Мырзабек Sputnik Кыргызстан радиосунун "Стимул" программасында маек куруп жатып Россияда чайканада иштеп жүрүп туруктуу кардарынан онлайн-кесип деген эмне экенин, ал кесиптерди өздөштүрүп көп киреше тапса болорун үйрөнгөнүн айтып берди.
Бактыгүл Мырзабек: биринчи кадамды жасоодон коркпогон адам ийгиликке жетет
Анын айтымында, билим алуу, квалификацияны жогорулатуу аркылуу ийгилик жаратууга болот.
"Россияда кичинемден эле окуп, иштеп жүргөм. Турмушка да эрте чыгып, декретте отурганда элдин баары өнүгүп, бир эле мен артта калгандай сезимдер болчу. Ошондо "үйдө эле отуруп акча иштеп таап, эч кимге көз каранды болбосом" деп кыялданчумун. Жолдошум экөөбүз Россияда жашачубуз. Декреттен чыгып чайканага ишке орношттум. Ал жерде биздин туруктуу кардарыбыз бар эле. Ошол жерден отуруп ноутбугун ачып алып бир нерсе кылат, ошол жерден тамактанып, жолугуушуларды өткөрөт эле. Күндүн соӊунда чоӊ суммада чек чыгат, аны төлөп, аны тейлеген официантка кошумча чай үчүн акча калтырчу. Мага кызык болуп "сиз ушул жерде эле отурасыз, жумушуӊуз жокпу?" деп сурасам, "менин жумушум ушул, мен маркетологмун" деп жооп берген. Көрсө, ал онлайн иштейт экен. Ошентип туруктуу кардарыман онлайн-кесип деген эмне экенин, ал кесиптерди өздөштүрүп көп киреше тапса болорун билдим. Мен дароо интернеттен изилдеп, онлайн-кесиптерди өздөрүүгө киришип, Россиядагы алдыӊкы адистерден билим алдым. Менин артыкчылыктуу жагым ушул деп айтсам болот. "Болбой калса эмне кылам, менин кантип колуман келмек эле" деп эч качан кетенчиктебейм. Чынында эле көп ойлонбостон бат чечим кабыл алган, биринчи кадамды жасоодон коркпогон адам ийгиликке жетет. Анан да билим алуу, квалификацияны жогорулатуу аркылуу ийгилик жаратууга болот. Азыркыга чейин билимимди ай сайын тереӊдетип, окуп келем. Алсак, Россиянын онлайн тармагынын алдыӊкы адистери Александра Митрошина, Настя Пикси, Кристина Софи, Марина Фоминанын курстарынан өттүм", — деди Бактыгүл Мырзабек.
Ал онлайн-кесиптерди өздөштүрүү аркылуу миллионер болуп, учурда бул кесиптерге окуткан курстарды түзүп, үйдө отурган кыз-келиндерге жана ишкерлерге каражат табууну үйрөтүп жатканын кошумчалады.
