Элечек ЮНЕСКОнун маданий мурастар тизмесине кириши мүмкүн
© Sputnik / Асель Сыдыкова
Жазылуу
"Кийиз дүйнө" коомдук фондунун жетекчиси жана сүрөтчү-дизайнер Айдай Асангулова ак калпакты жасоо өнөрү жана кийүү маданияты элдин колдоосу, жардамы менен ЮНЕСКОнун маданий мурастар тизмесине киргизилип, бир тыйын коробогонун айтты.
Ак калпак менен элечекти жасоо өнөрүн жана кийүү маданиятын ЮНЕСКОнун маданий мурастар тизмесине киргизүү демилгеси "Кийиз дүйнө" коомдук фонду тарабынан 2015-жылы көтөрүлгөн. Бул тууралуу Айдай Асангулова Sputnik Кыргызстан радиосунун эфиринде маек куруп жатып билдирди.
Элечек ЮНЕСКОнун маданий мурастар тизмесине кириши мүмкүн
Анын айтымында, башты сыйлаган адам өзүн жана өзгөлөрдү сыйлаганды билет.
"2010-жылы улуттук баш кийим ак калпактын кадыр-баркын көтөрүү максатында "Кыргыз калпагы муундан-муунга" долбоорун баштаган элек. Калпакты жашка карап кийүү эрежеси, өӊү, оюусу тууралуу концепция иштеп чыгып элге сунуштаганбыз. Ошондон баштап эле бизде "кантип калпакты мурас катары кийинки муунга калтырып, анын ордун жогорулата алабыз" деген ой болуп келген. Себеби кыргызда баш кийимге болгон мамиле өзгөчө. Бул тууралуу изилдөөчү, этнограф Амантур Акматалиев өзүнүн китебинде "Астына ат тарт, үстүнө чапан жап, бирок эч качан калпагыӊды кийгизбе!" деп жазганы бар. Ошентип ак калпак менен элечекти жасоо өнөрүн жана кийүү маданиятын ЮНЕСКОнун маданий мурастар тизмесине киргизүү демилгеси "Кийиз дүйнө" коомдук фонду тарабынан 2015-жылы көтөрүлдү. Бирок эки баш кийимдин мурас катары жолу эки башка болгондуктан экөөнү чогуу бере алган жокпуз. Төрт жыл катары менен аталган уюмдун талаптарын аткаруу багытында тийиштүү иштер жүрүп, жыйынтыгында 2019-жылы кыргыздардын ак калпагы ЮНЕСКОнун маданий мурастар тизмесине кирди. Жакында эле, июнь айынын башында, ЮНЕСКОнун башкы директору Одрэ Азуле улуттук баш кийимдин ЮНЕСКОнун тизмесине кирүүсү боюнча сертификатты тапшырды. Эми ак элечекти аталган уюмдун маданий мурастар тизмесине киргизүү аракеттери көрүлө баштады. Маданият министрлиги менен биргеликте билдирүү жөнөтүлдү. Ал күзүндө ноябрь айында каралары күтүлүүдө", — деди Асангулова.
Ал баш кийимди белек катары таратпоого чакырып, эл андай эле бергиси келип жатса сувенир иретинде жасалган баш кийимдерди тартууласа болорун кошумчалады.
