Быйыл Бишкекке газ менен жүргөн 744 автобус жана электробус алып келинет
© Sputnik / Асел Акмат
Жазылуу
Бишкек шаардык мэриясынын Транспорт жана жол-транспорттук инфратүзүмдү өнүктүрүү департаментинин директору Айдарбек Токонов калаанын коомдук транспорт көйгөйүн чечүү үчүн жасалган иштер тууралуу айтып берди.
Жыл соңуна чейин газ менен жүрүүчү 744 автобус жана электробустун келиши күтүлүүдө. Мындан тышкары, ушундай эле автобустан кийинки жылдын башында 500дү алып келүү каралган. Бул тууралуу Айдарбек Токонов Sputnik Кыргызстан радиосуна маек куруп жатып билдирди.
Быйыл Бишкекке газ менен жүргөн 744 автобус жана электробус алып келинет
Анын айтымында, муну менен шаардын ыш жана тыгын маселесин чечүүгө кандайдыр бир деңгээлде өбөлгө түзүлөт.
"Бишкекте коомдук транспорт маселеси көйгөй болуп саналат. Шаардын бул маселесин чечүү үчүн 1200-1300 автобуска муктаждык бар. 2022-жылы мэриянын бюджетинен миллиард сом бөлүнүп, заманбап газ менен жүргөн 120 автобус алып келинген. Быйыл жергиликтүү жана республикалык бюджеттен газ менен жүрүүчү миң автобус алуу үчүн 4 миллиард 806 миллион сом каралды. Буюрса ушул жылдын үчүнчү кварталында анын 500ү Кытайдан келери күтүлүүдө. Ага чейин автобустардын маршруттук схемалары чийилип, гараждар 1000ден ашуун автобус жайгаша тургандай болуп даярдалууда. Мындан тышкары, Азия өнүктүрүү банкы тарабынан 120 электробус келсе, Европа реконструкция өнүктүрүү банкынын көмөгү менен газ менен жүрүүчү 124 автобустун келиши мерчемделүүдө. Жалпысынан быйыл жыл соңуна чейин газ менен жүргөн 744 автобус жана электробустун келет. Мындан тышкары, кийинки жылдын башында калган 500 автобус келери пландалууда. Натыйжада шаардын ортосунда жүрүп жаткан кичи автобустар алмашат", — деди Токонов.
Ошондой эле ал бустар шаардын сыртында жүрө турганын кошумчалады.
