Бишкекте 5-июндан тарта жайкы мектеп лагерлери ачылат
© Sputnik / Асель Сыдыкова
Жазылуу
Бишкек мэриясынын Билим берүү департаментинин билим берүүнү өнүктүрүү бөлүмүнүн башкы адиси Гузель Турдубаева жайкы мектеп лагерлери 4300дөй окуучуну камтый турганын айтты.
Бишкекте жайкы мектеп лагерлери 20 жылдан бери иштеп келет. Бул тууралуу Гузель Турдубаева Sputnik Кыргызстан радиосунун эфиринде маек куруп жатып билдирди.
Бишкекте 5-июндан тарта жайкы мектеп лагерлери ачылат
Анын айтымында, быйыл чыгармачылык борборлору балдар үчүн жалпы 71 ийрим уюштурат.
"Борбор калаа мэриясынын Билим берүү департаменти шаардын 39 мектебинде жайкы мектеп лагерлерин уюштурууда. Анын 34үндө балдарга эки маал тамак берилет. Лагерлер 2023-жылдын 5-июнунан 30-июнуна, саат 8:00дөн 14:00гө чейин иштейт. Мектеп лагерлерине катышуу үчүн 4 285ке жакын окуучу катталды. Учурда лагерлерди ачууга даярдык иштери жүрүп, эс алууну каалаган окуучулардын тизмелери, лагерлердин иш планы, жайкы каникулга карата балдардын ийримдеринин жана спорт секцияларынын иштери такталып жатат. Мектеп лагеринин иштөө мезгилинде балдар ийримдерге катышууга мүмкүнчүлүк алышат. Ошондой эле маданий саякаттар, спорттук оюндар, сынактар жана башка көптөгөн иш-чараларга барат. Чыгармачылык борборлору балдар үчүн жалпы 71 ийрим уюштурат. Ар бир мектеп лагерине медициналык кызматкер, ашпозчу, борбордун ички иштер башкы башкармалыгынын жашы жете элек өспүрүмдөр менен иштөө инспекторлору бекитилип, балдардын коопсуздугун мектеп камсыздайт", — деди Турдубаева.
Ал жайкы лагерге барган бала ар кандай иш-чараларга катышып, өзүнүн күчтүү жактарын, билимин, социалдык шык-жөндөмүн колдонуп, ошондой эле өзүн өнүктүрүүгө мүмкүнчүлүк аларын кошумчалады.
