Улуттук банк тез эле байыйсың деген шылуундардан сак болууну эскертти
Жазылуу
Мекеме каржылык коопсуздук эрежелерин тизмектеди.
БИШКЕК, 27-май — Sputnik. Улуттук банк акыркы учурда интернет ресурстары, массалык маалымат каражаттары, социалдык тармактар, мессенжерлер жана байланыштын башка түрлөрү аркылуу Улуттук банк же башка каржы уюмдарынын атын жамынып акчалай жардам берүү, кайсы бир активди сатып алуу жөнүндөгү жалган маалыматтар тарап жатканын билдирди. Анда көбүнчө жарыбаган бир суммадагы каражатты салып эле аз убакыт ичинде байып кетүү, шилтеме аркылуу өтүп каражат алуу мүмкүндүктөрү бар деген чындыкка дал келбеген билдирүүлөр жазылууда.
Башкы банк шылуундар элдин көңүлүн буруу үчүн түрдүү жарнамаларды пайдаланып, ошол эле учурда алар элге белгилүү адамдардын сүрөттөрүн, Улуттук банктын атрибуттарын колдонушарын белгиледи. Буга байланыштуу жарандарды сак болууну, шектүү жактарга акча которуудан абайлоону, каржы коопсуздугу боюнча эрежелерди так сактоону эскертти:
расмий сайттарды гана колдонуңуз, текшерилбеген шилтемелерге өтпөңүз, ар кайсы жактарга жеке маалыматтарыңызды, картаңыздын маалыматтарын жазбаңыз;
картаңызды жоготуп же уурдатып алсаңыз, банкоматтын ичинде калып калса, же дагы башка абал жаралса дароо сизди тейлеген банкка кабарлаңыз;
банктагы операцияларыңызды текшерип туруңуз. Сиз каражат чыгарып албаган учурда мындай аракет жасалганын билсеңиз банкка текшерүү жүргүзүү өтүнүчү менен кайрылыңыз;
электрондук капчыкты колдонууда түшүнүксүз, шектүү шилтемелерге өтпөңүз, ал жакка жеке маалыматтарды жазбаңыз;
электрондук капчыктардын тиркемеси жүктөлгөн уюлдук телефонуңузду уурдатып жиберсеңиз бул тууралуу тез арада банкка маалымдап, капчыкты жаптырыңыз;
банкоматта бейтааныш адамдардан акча чыгарып берүү жардамын сурабаңыз;
картаңыздын номерин, ПИН-кодун, картанын жарактуу мөөнөтүн жана CVV/CVC-коддорду эч кимге, эч бир жакка бербеңиз;
электрондук капчыкты пайдаланууда татаал сыр сөздү колдонуңуз;
шылуундардын тузагына илинип калсаңыз тезинен банкка жана укук коргоо органдарына кайрылыңыз.
