Ошто өтө турган VII эл аралык эпос фестивалында болчу иш-чаралар. Тизме
© Sputnik / Асель Сыдыкова
Жазылуу
VII эл аралык эпостор фестивалы быйыл 17-21-майда Ош шаарында өтөт. Ага жалпысынан 30дан ашуун өлкөдөн окумуштуу, изилдөөчү, айтуучу, уздар катышары күтүлүүдө.
Фестивалдын уюштуруучусу Дамира Алышпаева Sputnik Кыргызстан радиосуна маек куруп жатып дүйнө элдеринин эпос фестивалы брендге айланып калганын белгиледи.
Ошто өтө турган VII эл аралык эпос фестивалында болчу иш-чаралар. Тизме
Анын айтымында, быйыл фестиваль илимий-практикалык симпозиум жана маданий багыт болуп эки компоненттен турат.
"VII эл аралык эпостор фестивалына 30дан ашуун өлкөдөн окумуштуу, изилдөөчү, айтуучу, уздар катышат. Фестивалда илимий-практикалык симпозиум болуп, анда илимий докладдар окулат. Ошондой эле иш-чарада "Маданияттагы ар түрдүүлүктүн парады" деп аталган экинчи компонент бар. Бул бөлүгүндө боз үйлөрдүн, айтуучулардын сынагы сыяктуу иш-чаралар пландалган. Айтуучулук сакталып калган улут катары Кыргызстан — эпостордун мекени деп айтылып келет. Ошондуктан бул багыттагы иш-чараларга басым жасалат. Мындан тышкары, дастанчылардын сынагы дагы кошулат", — деди Алышпаева.
Ал эми "Манас" театрынын директорунун орун басары, манасчы Нурбек Талантбеков эл аралык эпостор фестивалдын алкагында манасчылардын сынагы салттуу түрдө өтүп келгенин айтты.
© Sputnik / Асель Сыдыкова
"Быйыл VII эл аралык эпостор фестивалынын алкагында семетейчилердин сынагы болгону турат. Анткени соңку учурда айтуучулар арасында Манаска басым жасалып, Семетей калып кетүүдө. Ошондуктан сынакка даярдык көрүлгөндө Семетей айтууга басым жасалып, миң бала катышты. Анда балдардын айтуусуна, артистизмине, кыраатына жана үнүнө маани берилди", — деди Талантбеков.
Ошондой эле ал сынакта айтуучуларга жаттап айтууга эмес, эпостун мазмунун бузбай төгүп, жамактап кошуу талап кылына баштаганын кошумчалады.
