Айдыралиев: Париж Паралимпиадасына төрт жолдомо утууну көздөп жатабыз
© Sputnik / Асылбек Бактыбеков
Жазылуу
Улуттук Паралимпиада комитетинин президенти Токторбек Айдыралиев параспортту өнүктүрүү боюнча атайын программа кабыл алынып, спорттук шаймандар менен камсыздалса жакшы жыйынтык болорун айтты.
2024-жылы Парижде өтө турган Паралимпиада оюндарына төрт жолдомо утууну көздөп жатабыз. Алсак, пара пауэрлифтинг, пара жеңил атлетика, пара сууда сүзүү, пара дзюдо спортунан лицензия алууга мүмкүнчүлүк бар. Бул тууралуу Токторбек Айдыралиев Sputnik Кыргызстан радиосунун эфиринде маек куруп жатып билдирди.
Айдыралиев: Париж Паралимпиадасына төрт жолдомо утууну көздөп жатабыз
Анын айтымында, параспорт менен өлкө аймагында машыккандардын саны жокко эсе.
"Акыркы жылдары Кыргызстанда параспорт боюнча эл аралык мелдештерде жакшы жыйынтыктар боло баштады. Учурда болжол менен параспорттун 10 түрү боюнча машыгып келишет. Тилекке каршы, спортчулар шарттын жоктугунан колдон келген аракеттерди көрүп, даярданышат. Спорттук шаймандар жетиштүү болсо жыйынтыктар да башкача болот эле. Мисалы, паралимпиадачы Арстанбек Базаркулов атайын шаймандын жоктугунан шаардын сыртына чыгып, ташты скотч менен ороп алып, аны ыргытып машыккан күндөрү болду. Ошондуктан бул тармакты алдыга жылдыруу үчүн мамлекеттик программа кабыл алуу керек. Алсак, параспорт менен өлкө аймагында машыккандардын саны жокко тете. Кандай болгон күндө да машыгууларды таштабай, өлкө намысын эл аралык мелдештерде коргогонго күчүн арнап жатышат. Буюрса 2024-жылы Парижде өтө турган Паралимпиада оюндарына төрт жолдомо утууну көздөп жатабыз. Пара пауэрлифтинг, пара жеңил атлетика, пара сууда сүзүү, пара дзюдо спортунан лицензия алуу мүмкүнчүлүгүбүз бар", — деди Айдыралиев.
Ошондой эле адис октябрда Кытайда өтө турган IV ПараАзия оюндарына кыргызстандыктар кызуу даярдык көрүп жатканын кошумчалады.
