Мукашев: Кыргызстанда алгачкы ирет шашки боюнча Азия чемпионаты өтөт
© Sputnik / Асылбек Бактыбеков
Жазылуу
Кыргыз азиздер жана дүлөйлөр коомунун төрагасынын орун басары, Паралимпиада комитетинин вице-президенти Эрмек Мукашев Кыргызстан эл аралык пара спорт уюмдары менен тыгыз иштеше баштаганын айтты.
Ушул жылдын сентябрь айында Кыргызстанда алгачкы ирет шашки боюнча Азия чемпионаты өтөт. Ага континенттин мыкты шашки чеберлери келип, чемпиондук үчүн акыл күчүн сынашат. Бул тууралуу Эрмек Мукашев Sputnik Кыргызстан радиосунун эфиринде маек куруп жатып билдирди.
Мукашев: Кыргызстанда алгачкы ирет шашки боюнча Азия чемпионаты өтөт
Анын айтымында, былтыр Ысык-Көлдө шашки боюнча дүйнө биринчилиги жогорку деңгээлде өтүп, тилекке каршы, кыргызстандык спортчулар байгелүү орунга илинген эмес.
"Биз пара спортту өлкөдө жайылтып, майыптыгы бар балдарга шарт түзүп, спорт аркылуу ден соолугун чыңдоого аракет көрүп келебиз. Ден соолугунан мүмкүнчүлүгү чектелгендер коомдо өзүн эркин алып, спорт аркылуу бийиктиктерге жетсе деген тилегибиз бар. Ошол себептен майыптар арасында шашки жана шахмат боюнча мелдештерди өткөрүп баштадык. Былтыр Ысык-Көлдө шашки боюнча дүйнө чемпионаты жогорку деңгээлде өткөн. Тилекке каршы, биздин спортчулардын көбү байгелүү орунга илинген эмес. Бирок бул турнир балдардын жеңишке болгон дараметин ойготуп, жакшы тажрыйба берди. Мындан тышкары, эл аралык уюмдар менен тыгыз байланышта болуп, кызматташа баштадык. Эми быйыл сентябрда шашки боюнча Азия чемпионаты Кыргызстанда болот. Эл аралык федерация ири мелдешти өткөрүүгө жоопкерчиликти бизге берип, ишеним артып жатканы кубандырат. Буга континенттин мыктылары келип, акыл сынашат. Азырынча кайсы өлкөлөрдөн спортчулар келери такталып жатат", — деди Мукашев.
Ошондой эле адис Азия чемпионатына кыргызстандык спортчулар кызуу даярдык көрүп, байгелүү орун алууга аракет көрөрүн кошумчалады.
