Ишеналы Арабаев атындагы КМУда россиялык университеттин өкүлчүлүгү ачылат
10:23 13.04.2023 (Жаңыртылды: 14:56 13.04.2023)
© Sputnik / Асел Акмат
Жазылуу
Ишеналы Арабаев атындагы Кыргыз мамлекеттик университетинин ректору, филология илимдеринин кандидаты Айгүл Абдраева аталган окуу жайдын эл аралык мамилелерине токтолду.
Иммануил Кант атындагы Балтика федералдык университети Ишеналы Арабаев атындагы Кыргыз мамлекеттик университетинде өзүнүн өкүлчүлүгүн ачат. Бул тууралуу Айгүл Абдраева Sputnik Кыргызстан радиосуна маек куруп жатып билдирди.
Ишеналы Арабаев атындагы КГУда россиялык университеттин өкүлчүлүгү ачылат
Анын айтымында, россиялык окуу жайдын өкүлчүлүгү ушул жылдын июнь айында эшигин ачары күтүлүүдө.
"Ишеналы Арабаев атындагы Кыргыз мамлекеттик университети "Даңк" медалына ээ болду. Бул да болсо окуу жайдын көп жылдык тарыхы, кыргыз агартуусуна кошкон салымы үчүн берилди. Биз өлкөдөгү педагогикалык багыттагы негизги окуу жай болгондуктан чет мамлекеттердеги өзүбүз сыяктуу университеттер менен иштешип, байланыштарыбызды кеңейткенге дайыма аракет кылабыз. Анткени мындай жол менен биздин студенттер тажрыйба алмашып, башка мамлекеттерден билим алып келгенге мүмкүнчүлүктөр жаралат. Көптөгөн өлкөлөр менен иштешебиз, анын ичинде өзгөчө тыгыз алакабыз Россия Федерациясынын бир нече окуу жайы менен уланып келүүдө. Алардын бири Иммануил Кант атындагы Балтика федералдык университети өзүнүн өкүлчүлүгүн ачууга белсенип турат. Бул өкүлчүлүк ишке кирсе эки окуу жайдын алакасы жаңы баскычка көтөрүлөт. Маселени талкуулоо үчүн жакында эле биздин илимий иштер боюнча проректорубуз федералдык университетке барып келди. Жолугушуунун алкагында орус тили жана адабияты багыты боюнча "2+2" форматындагы окууну киргизип, кош диплом берүү, илимий, академиялык кызматташууну өнүктүрүү маселелери талкууланды", —деди Абдраева.
Ал эки униврситеттин ортосунда билим берүү жаатында да долбоорлор талкууланганын кошумчалады.
