Менделеев олимпиадасына 20дан ашык мамлекеттин окуучулары катышат
19:10 11.04.2023 (Жаңыртылды: 19:12 11.04.2023)
© Фото / пресс-служба Международной Менделеевской олимпиады школьников по химии
Жазылуу
Эл аралык Менделеев олимпиадасы 1997-жылдан бери жалпы союздук олимпиаданын ордуна өткөрүлүп келет.
БИШКЕК, 11-апр. — Sputnik. 1инен 6-майга чейин Казакстанда өтө турган мектеп окуучуларынын химия (ММО-57) боюнча 57-эл аралык Менделеев олимпиадасына 20дан ашык мамлекеттен келген окуучулардын командалары катышат. Бул тууралуу иш-чаранын уюштуруучу комитети Sputnik агенттигине билдирди.
2023-жылдагы олимпиада ковиддик чектөөлөр алынгандан берки экинчи ирет офлайн өткөнү жатканын олимпиаданын уюштуруучу комитетинин төрагасы, Россия Илимдер академиясынын вице-президенти жана МГУнун химия факультетинин илимий жетекчиси Степан Калмыков билдирди.
Россия Илимдер академиясынын вице-президенти жана МГУнун химия факультетинин илимий жетекчиси Степан Калмыков
© Sputnik / Нина Зотина
"Быйыл катышуучу өлкөлөрдөн түшкөн билдирмелер дароо 30 пайызга өстү. Мындан ары дагы көбөйө берет деген үмүттөбүз", — деди ал.
Менделеев олимпиадасына: Австрия, Азербайжан, Армения, Беларусь, Болгария, Венгрия, Израиль, Казакстан, Кыргызстан, Македония, Монголия, Бириккен Араб Эмираттары, Россия, Сауд Арабия, Сирия, Тажикстан, Түркмөнстан, Түркия, Өзбекстан, Хорватия жана башка мамлекеттердин курама командалары катышат. Турнирге катышуу үчүн билдирмени алгачкылардан болуп бразилиялык команда жөнөткөн.
"Республиканын өкмөтү жана Билим берүү министрлигинин колдоосу менен 2002, 2012 жана 2017-жылдары Менделеев олимпиадасы Казакстанда өткөн. Быйыл негизги таймаштар Астанада, Назарбаев университетинин лабораториялары менен аудиторияларында болот. Жогорку окуу жайдын техникалык жактан жабдылышы олимпиаданы өткөрүү шарттарына толук жооп берет", — деди Казакстандын Агартуу министрлигинин "Дарын" республикалык илимий-практикалык борборунун директору Гаждембек Турсунов.
Казакстандын Агартуу министрлигинин "Дарын" республикалык илимий-практикалык борборунун директору Гаждембек Турсунов
© Фото / пресс-служба Министерства просвещения РК
Эл аралык Менделеев олимпиадасы 1997-жылдан бери жалпы союздук олимпиаданын ордуна өткөрүлүп келет. Таймаш беш-алты күнгө созулуп, эки тур менен өтөт (эки теориялык жана бир практикалык).
Олимпиаданын катышуучуларына уюштуруучулардан диплом жана баалуу белектер тапшырылат. Ал эми байгелүү орундардын ээлери коло, күмүш жана алтын медаль менен сыйланышат. Алтын медалдан тышкары абсолюттук жеңүүчүгө Андрей Мельниченко фонду тарабынан түзүлгөн академик В. В. Лунин атындагы сыйлык тапшырылат. 2022-жылы ал эки миллион рублди түзгөн.
Олимпиаданын уюштуруу комитетинин теңтөрагасы, Андрей Мельниченко фондунун аткаруучу директору Александр Чередник
© Sputnik / Нина Зотина
"Бул сыйлык эл аралык Менделеев олимпиадасын түптөп, өмүрүн химиялык илимге жана химия билимине арнаган адамдын элесине арналган. Бул химиктердин жаш муунуна өткөрүп берген эстафеталык таякча болуп калды. Алар биздин келечек", — деди олимпиаданын уюштуруу комитетинин теңтөрагасы, Андрей Мельниченко фондунун аткаруучу директору Александр Чередник.
Иш-чаранын ачылышы жана жабылышы олимпиаданын расмий баракчаларында түз эфирде көрсөтүлөт.
27 Жалган Куран 2023, 12:59
