Юрист: чет элдиктерди милиция каалаган учурунда токтотуп текшере албайт
© Sputnik / Асель Сыдыкова
Жазылуу
Адвокат Куватбек Шатманов өлкөдө жүргөн чет элдик жарандардын коомдук тартипти сактоодогу укук, милдеттерин түшүндүрүп берди.
Чет элдик жарандар студенттер, туристтер, эмгек мигранттары жана дипломаттар болуп категорияларга бөлүнөт. Ар бир категориянын өзүнө жараша укуктук ченемдери бар. Кыргызстанга келген чет өлкөлүктөр ошол эрежелерди сактап жүрсө эле көйгөй жаралбайт. Бул тууралуу Куватбек Шатманов Sputnik Кыргызстан радиосуна маек куруп жатып билдирди.
Юрист: чет элдиктерди милиция каалаган учурунда токтотуп текшере албайт
Анын айтымында, чет элдик жаранды эч себепсиз эле көчөдөн токтотуп алып документтерин текшерүүгө милиция кызматкерлеринин укугу жок.
"Чет элдиктер жөнүндө сөз болгондо дипломаттык чини бар жарандарды эске албаганда, коомдук тартипти сактоо эрежелери кыргызстандыктардыкынан эч айырмаланбайт. Кандайдыр бир административдик мыйзам бузуу катталса кадимкидей эле биздин жарандарга колдонулган мыйзамдын алкагында жоопко тартылат, айып пул салынат. Болбосо Кылмыш-жаза кодексинин алкагында соттолот, Кыргызстандагы абактарда мөөнөтүн өтөйт. Ал эми дипломаттык чини барлардын кол тийбестиги бар, буларга мыйзам башкача иштейт. Эгер биз өлкөдө жүргөн чет элдиктердин жөнөкөй эле күнүмдүк жашоодогу укук, милдеттери тууралуу кеп кыла турган болсок, алар биздин мамлекетке келе жатканда, биринчиден, бул жактын талаптарына ылайык документтерин тууралап алуусу шарт. Мындай учурда эч кандай көйгөй жаралбай эркин жүрө беришет. Анан да аларды милиция каалаган учурда, каалаган жерден өңү башка болгону үчүн эле токтотуп, документтерин текшере бергенге укугу жок. Мындай иштер атайын рейддердин алкагында гана жүргүзүлөт же болбосо чет элдик жаран кандайдыр бир кылмышка шектүү же шектүүгө окшош учурда гана көчөдөн токтотуп, документтерин талап кыла алышат. Чет элдик жаран мейли студент, ишкер же турист болсун, документтери жайында болсо, бирок тартип сакчылар токтотуп, анын укугун тебелеген болсо эч тартынбай тиешелүү органдарга, прокуратурага кайрылса болот. Ошондой эле чет элдик жаранды мыйзамсыз токтотуп жатканын көргөн учурда жергиликтүү тургундар да анын милиция кызматкери менен болгон маегине аралашып, мыйзам чегинде маселенин чечилишине көмөк көрсөтө алат. Милиция жергиликтүү тургунду аралаштырбай кое албайт", — деди Шатманов.
Ал өлкөгө туристтерди тартууда милиция кызматкерлеринин чет элдиктерге жасаган сылык мамилеси да орчундуу мааниге ээ экенин кошумчалады.
