Бишкек ыш менен кантип күрөшөт? Иш-чаралардын узун тизмеси
13:48 24.03.2023 (Жаңыртылды: 13:52 24.03.2023)
Жазылуу
Бишкекти өнүктүрүү жана инвестиция тартуу агенттигинин директору иш-чаралардын тизмесин санап берди. Өткөн жылы Бишкекти өнүктүрүү программасы кабыл алынган.
БИШКЕК, 24-мар. — Sputnik. Борбор калааны өнүктүрүү боюнча бир катар чаралар каралган. Анда экология темасы дагы камтылган. Бул тууралуу Бишкекти өнүктүрүү жана инвестиция тартуу агенттигинин директору Курманбек Молдокулов билдирди.
Ал Россия менен Кыргызстандын эксперттери катышкан "Бишкектеги ыш: көйгөйлөр жана чечүү жолдору" аттуу тегерек столдо сөз сүйлөдү.
Иш-чараны Ломоносов атындагы МГУнун алдындагы постсоветтик өлкөлөрдөгү коомдук-саясий процесстерди изилдеген Маалыматтык-аналитикалык борбор уюштурду.
Молдокуловго мэрия шаардын экологиясын кантип жакшыртары тууралуу суроо узатылды.
Ал муниципалитет өткөн жылы Бишкектин 2026-жылга чейин өнүктүрүү программасын кабыл алганын кабарлады. Ага ылайык, борбор калаа жашыл шаарга айланат. Анын алкагында иш план бекитилген.
Аткарыла турган иштер:
борбор калаадагы көмүр жагылган 22 от казан быйыл толугу менен газга өтөт;
алдыдагы 3-4 жыл ичинде шаарды толугу менен газдаштыруу пландалууда;
таштандыны кайра иштетүү заводу боюнча инвесторлор менен протокол жана жол картасына кол коюлду. Жакында техникалык-экономикалык негиздемеси иштелип чыгат;
быйыл эски таштанды полигонун өчүрүү жана рекультивациялоо пландалууда;
газ менен жүргөн 120 автобус алынды;
быйыл 120 электроавтобус жана газ менен жүргөн 250 автобус сатып алуу пландалууда (Азия өнүктүрүү банкы менен Евразия өнүктүрүү банкынын каражатына);
президент газ менен жүргөн 1000 автобус сатып алуу тапшырмасын берген. Молдокуловдун айтымында, автобустардын жарымы жай айында алып келинет;
ирригация толугу менен калыбына келтирилип жатат. Жыл сайын 10 миң көчөт отургузуу пландалып жатат. Бирок бийлик аны 15 миңге жеткирүүнү каалап жатат;
быйыл конуштарда муниципалдык мончолордун курулушу башталат. Аталган аймактарда жеке мончолор бар, алардын эмне жагары белгисиз;
быйыл электротакси долбоорун ишке киргизүү ниети бар;
электрокубаттагыч станцияларды куруу пландалууда. Учурда ага орундар тандалып жатат.
