"Эр Төштүк" эпосунун энциклопедиясы түзүлдү
12:41 28.02.2023 (Жаңыртылды: 10:36 15.06.2023)
© Sputnik / Асел Акмат
Жазылуу
"Манас" улуттук академиясынын президенти, маданиятка эмгек сиңирген ишмер, филология илимдеринин доктору Талантаалы Бакчиев китеп 1000 нуска менен жарык көргөнүн, ал жер-жерлерге бекер таратыларын айтты.
1995-жылы "Манас" эпосунун 1000 жылдыгын утурлай эпостун 2 томдугу чыккан. Андан кийин 2000-жылдары Сагынбай Орозбаков жана Саякбай Каралаевдин энциклопедиялары жарык көргөн. Андан кийин эле элдик оозеки чыгармачылыкка арналган энциклопедия "Эр Төштүк" кенже эпосу жөнүндөгү ушул китеп болуп калды. Бул тууралуу Талантаалы Бакчиев Sputnik Кыргызстан радиосуна маек куруп жатып билдирди.
"Эр Төштүк" эпосунун энциклопедиясы түзүлдү
Анын айтымында, манасчы кенже эпостордун энциклопедиясын түзүүнү "Манас" улуттук академиясына кызматка келгенге чейин эле пландап жүргөн.
"Эр Төштүк" кенже эпосунун энциклопедиясын түзүү жеңилге турган жок. Тырмак алды эмгек болуп, анын үстүнө эпос өзү байыркы, мифологиялык окуяларга жык болгондуктан илимий анализ жүргүзүү бир топ түйшүк жаратты. Бирок биздин максат азыркы учурда анчейин айтылбай келе жаткан, эске алынбай жүргөн кенже эпосторго кайрадан өмүр берүү, илимий талдоого алуу, жайылтуу болчу. Кайсы бир деңгээлде максатыбызга жеттик. Ошону менен бирге эле "Эр Төштүк" көлөмү жагынан "Манастан" кийинки орунда турган, башка элдерде да варианттары бар эпос. Биз мунун баарын энциклопедияга камтыганга аракеттендик. Энциклопедия 1000 нускада мамлекеттик заказ менен жарык көрдү. Сатылбайт, жер-жерлерге бекер таратылат. Эгер демөөрчү чыгып эле буюртма берип кайрадан басып чыгарбасак, азырынча кайталап басып чыгаруу каралган эмес. Бирок электрондук вариантын академиянын сайтынан таап окуса болот", — деди Бакчиев.
Ал "Эр Төштүк" эпосунун энциклопедиясына карата айтылчу бардык сын-пикирлерге жамаат ачык экенин кошумчалады.
