Жапаров: үч жылда күч түзүмүндөгү кызматкерлердин баары үй менен камсыздалат
10:17 27.02.2023 (Жаңыртылды: 10:23 27.02.2023)
Жазылуу
Мамлекет башчынын айтымында, быйыл жылдын аягына чейин 15 миңдей батир курулуп бүтөт.
БИШКЕК, 27-фев. — Sputnik. Алдыдагы үч жылдын ичинде күч түзүмдөрүндө иштеген бир дагы кызматкер турак жайсыз калбайт. Бул тууралуу президент Садыр Жапаров билдирди.
Мамлекет башчы укук коргоо, бажы жана көзөмөлдөө органдарынын жетекчилерине генерал наамын тапшырып жатып, бул тармак анын ар дайым көңүл чордонунда турарын белгилеген.
"Эмгек акыңарды көтөрүп бердик, турак жай маселесин чечип жатабыз. Алдыдагы үч жылдын ичинде ИИМ, УКМК, прокуратура, чек арачыларда бир дагы үйү жок адам болбойт. Мамлекеттик ипотека аркылуу биз 20-25 жылдык мөөнөткө батирлерди беребиз. Жөнөкөй кызматкерлердин да маянасы аны алганга жетет. Быйыл жылдын аягына чейин 15 миңдей батир курулуп бүтөт. Андан кийин эки жылда дагы 50-60 миң адамга, анын ичинде мамлекеттик кызматкерлерге да беребиз. Машиналарыңар болсо баарыңардыкы жаңы, ИИМ системасынын дээрлик 90 пайызын жаңылап бердик. Прокуратурага кечээ 17 автоунаа бердик, УКМКныкын 100 пайыз жаңыладык десек болот. Мындан ары дагы жакшы шарттарды түзүп беребиз. Калганы — жакшы иштөө, мамлекеттин коопсуздугун кароо, коррупцияны жоюу силерден көз каранды. Өзүңөр коррупцияга аралашып кетпегиле. Тилекке каршы, араңардан чыгып калууда, алар тиешелүү жазасын алып жатат", — деди Жапаров.
Төмөнкү кызматкерлерге жогорку наам ыйгарылды:
Башкы прокурордун орун басары Сагындык Мукашовго юстициянын генерал-майору;
Башкы прокурордун орун басары Кубан Адыл уулуна юстициянын генерал-майору;
Баткен ОИИБдин жетекчиси Мурат Бороновго милициянын генерал-майору;
ИИМ Академиясынын начальниги Тариел Абитовго милициянын генерал-майору;
Мамлекеттик бажы кызматынын төрагасы Самат Исабековго бажы кызматынын генерал-майору.
