"Жашыл мурастын" алкагында 15 млн. көчөт даярдоо пландалууда
13:13 16.02.2023 (Жаңыртылды: 13:32 16.02.2023)
© Sputnik / Асел Акмат
Жазылуу
Айыл чарба министрлигине караштуу Токой кызматынын токой экосистемаларын өнүктүрүү башкармалыгынын башчысы Майрамбек Алиев токойлорду жаңыртуу иштери тууралуу айтып берди.
2 260 гектар токой отургузуу пландалууда. Бул өткөн жылга салыштырмалуу эки эсе көп экенин Майрамбек Таабалдиев Sputnik Кыргызстан радиосуна маек куруп жатып билдирди.
"Жашыл мурастын" алкагында 15 млн. көчөт даярдоо пландалууда
Анын айтымында, бак-дарактын көпчүлүгү быйыл Жалал-Абад, Баткенге отургузулат.
"Былтыр "Жашыл мурас" өнөктүгүнүн алкагында токой фондунун 1 170 гектар жерине көчөттөр отургузулган. Быйыл бул көрсөткүч эки эсе көбөйтүлүп, аянтын 2 260 гектарга жеткирүү пландалууда. Соңку 15 жылдын ичинде Баткенде эки миң гектар жерге сөксөөлдүн көчөттөрү тигилген. Бул өз кезегинде аймактын флора жана фаунасынын жакшырышына өбөлгө түзүүдө. Ошондой эле жергиликтүү элдин отун, жайыт маселеси чечилүүдө. Мурда ал жерлер таштак болсо азыр чөп чыгып, мал жаюуга ыңгайлуу болуп баратат. Жалал-Абадда 350-400 гектардай жаңгак, калган аймактарга жерине ылайыктуу бактарды отургузуу каралган. Мындан тышкары, "Жашыл мурастын" алкагында былтыр 13 миллион көчөт даярдалса, быйыл 15 миллионго чейин жеткирүү максатталууда. Анткени эл арасында бул өнөктүккө кызыгуу артып жатат. Мындан улам аймактардагы калктын тапшырыгы менен бир миллиондой базар экономикасына ылайыкташкан 55 көчөттүн түрүн өстүрүү иш планга киргизилди", — деди Алиев.
Адис көчөттөрдүн өсүп кетүүсүнө мал чарбачылыгы тоскоолдук жаратып жатканын кошумчалады.
