Садыр Жапаров Баткендеги курулуш боюнча иликтөөгө жооп берди
13:35 01.02.2023 (Жаңыртылды: 14:32 01.02.2023)
Жазылуу
Sputnik Кыргызстан агенттиги "Кан төгүлгөн Баткендеги көмүскө кызыкчылыктар. Артында Туманбаев турабы?" деп аталган иликтөө жарыялаган. Анда эмне себептен үйлөр белгиленген мөөнөттө курулуп бүтпөгөнү тууралуу маселе көтөрүлгөн.
БИШКЕК, 1-фев. — Sputnik. Президент Садыр Жапаров "Кабар" улуттук маалымат агенттигине маек куруп, Баткендеги үйлөрдүн чуу жараткан курулушу тууралуу айтып берген.
Эскерте кетсек, Sputnik Кыргызстан агенттиги "Кан төгүлгөн Баткендеги көмүскө кызыкчылыктар. Артында Туманбаев турабы?" деп аталган материал жарыялап иликтөө жүргүзгөн. Анда эмне себептен үйлөр белгиленген мөөнөттө курулуп бүтпөгөнү, өкмөттөн акча бөлүнүп, бирок субподрядчыларга жетпей калганы жана 20 жаштагы студенттин кечээ жакында негиздеген компаниясынын тендерди утуп алганы тууралуу маселе көтөрүлгөн.
Өлкө башчы сөзүндө былтыр сентябрь айында Баткендеги жабыркаган үйлөрдү жаңыдан куруу жаатында долбоорлорду даярдоо боюнча Мамлекеттик курулуш жана турак жай агенттигине тапшырма бергенин белгиледи.
"Бир аптадан кийин долбоорду алып келишти. Алардын сметасы боюнча ар бир үйдү 5 500 000 сомго курушубуз керек экен. Анан мен иш башкармалыктын жана жеке курулуш адистерин топтодум дагы: “Ар бир үйгө 5 500 000 кетет деген бул өтө кымбат. Ортодо мамлекеттин акчасын жеп көнүп калышкан мамлекеттик кызматкерлердин бул сметасы мага жаккан жок. Бир үйгө канча акча кетет экен, силер эсептеп чыккылачы” деп тапшырма бердим. Эки күндө мага сметасын алып келишти. Бир үйгө 3 300 000 сомдон акча кетет экен. “Эч ортомчусу жок ушул суммага кургула” деп дароо тапшырма бердим. Ошентип ар бир үйдөн 2 200 000 сомдон үнөмдөп калдык. Ошондо эсептеп көргүлө, Баткенге баш-аягы 500дөн ашык үй салабыз. Ар бир үйдөн 2 200 000 сомдон айырма болгондо эле бир миллиарддан ашык сом мамлекеттин акчасын үнөмдөдүк. Эгер мамлекеттик курулушка ишенип, “Ии болуптур, сала бергиле” деп койгонумда бул акчаны саналуу кишилер жана ортомчу компаниялар жеп кетмек. Мен бул акчаны алардын оозунан жулуп алдым да. Алар: “Ушунун баарын иш башкармалыктын жетекчиси Каныбек Туманбаев кылып жатат” деп ойлоп жатышат. Ошол үчүн ага акчадан куру калгандар маалыматтык чабуул башташты", — деди Жапаров.
Президент ортодон акча “жасап алууга” жеке тапшырмасы менен бөгөт коюлганын айтып, "Каныбек – мыкты аткаруучу, мыкты көзөмөлдөөчү. “Бир тыйын болсо да мамлекеттин акчасы үнөм болсун” деп турган кызматкерлердин бири" экенин белгиледи.
