Туманов: кен байлыкка лицензия 2023-жылдан тарта аукцион аркылуу берилет
© Sputnik / Асель Акмат
Жазылуу
Геология жана жер казынасы департаментинин директору, министрдин орун басары Алмаз Туманов 2023-жылдан тарта кен байлыкты иштетүүгө лицензия берүү аукцион аркылуу өтөрүн айтты.
Эми кен байлыктарды казууга лицензия аукцион аркылуу гана берилет. Ага да 30 пайыздан кем эмес үлүшүн мамлекетке берүүгө макул болгон гана компаниялар эле катышат. Бул тууралуу Алмаз Туманов Sputnik Кыргызстан радиосуна маек куруп жатып билдирди.
Туманов: кен байлыкка лицензия 2023-жылдан тарта аукцион аркылуу берилет
Анын айтымында, буга чейин кен казган компаниялар лицензияны сатып алган соң жылына бир ирет гана мамлекетке отчет берип турушкан.
"Шарт боюнча, коомдук угуу өткөрүп, уруксат кагазын алуу, археологиялык баалуу жай эмес экенин тастыктоо, экологияны сактоо боюнча бардык көрсөтүлгөн техникалык талаптарды аткаруу сыяктуу талаптар коюлуп келген. Чалгындоо, казып алуу иштеринде да ушундай эле көрүнүш болчу. Тилекке каршы, мунун баары кагаз жүзүндө калып, жылына бир ирет гана мамлекетке отчет берип коюп, башка учурда каалагандай ишмердүүлүгүн жүргүзүшкөн. Эми мындай болбойт. Аталган тармак боюнча мыйзамга өзгөртүүлөр кирди. Буга чейин лицензия берүүгө мораторий киргизилген болсо, 2023-жылдан тарта аукцион аркылуу гана бериле баштайт. Бирок мамлекет ошол компаниялар менен мамлекеттик ишкана болгон "Кыргыз алтын" же "Кыргыз геология" сыяктуу мекемелер аркылуу түздөн-түз иштешет. Тактап айтканда, жергиликтүү калк менен түшүндүрүү иштерин жүргүзүү, геочалгындоо, экология боюнча долбоорлорду иштеп чыгуу сыяктуу жумуштарды биздин адистер кайра эле ошол инвестордун каражатына жасап беришет. Бул каражат мамлекеттик кызматкерлердин аброюн көтөрүү максатындагы жаш кадрларды колдоо иштерине жумшалат", — деди Туманов.
Ал мындан ары кен байлыктарды казып алуу жаатында катуу талаптар коюларын кошумчалады.
