Калыбеков: мамлекет чыгармачыл союздарды колдоого алышы керек

"Азыр шоумендер, динчилдер анан саясатчылардын заманы болуп калды. Мындан 30 жыл мурда эле баалуулуктар такыр башка болгон. Элдин баары китеп окуп, ЖМК жогорку баалуулуктарды алып жүргөн инсандар менен толуп турар эле. Учурда күнүмдүк ызы-чууларга маани берип, ошолорду талкуулоо менен алек болуп калдык. Кубантканы - мамлекет тарабынан манасчы, дастанчы, төкмө акындар колдоого алынып, "Манас" театры түзүлдү. Ошол эле учурда адабиятты массалык жана интеллектуалдык деп карасак, интеллектуалдык адабиятка кош көңүл мамиле кылынууда. Өз кезинде "өздүк көркөм чыгармачылык" деген түшүнүк бар эле. Айылдарга филармониянын артисттери айда-жылда барбаса, негизинен райондун артисттери комуз, шылдырак, аккордеон менен бара турган. Ошол сыяктуу учурда адабият "өздүк көркөм чыгармачылык" деңгээлине түшүп калгандай түр калтырууда. Топ-топ болуп биригип алып, социалдык тармактарга чыгармаларын жарыялашат. Анан бири-бирине сыйлыктарды ыйгарышат. Кайсы бир деңгээлде жакшы, өз жанын багуу деген түшүнүк бар эмеспи. Ошол эле учурда алгач эгемендүүлүк алган жылдары китеп окуу солгундап калганы болбосо кыргыз негизи адабияттын эли да. Дүйнөдөгү эң көлөмдүү "Манас" эпосу бар, ал эми профессионалдык адабиятты Чыңгыз Айтматов дүйнөлүк алкакка чыгара алган. Ошондуктан бул тармакка колдоо, багыт көрсөткөн мамлекеттик саясат жүргүзүлүшү керек. Албетте, базардын талабына жараша чыгарма жаратып, жан бага берсе болот. Бирок адабият коомдун алдында болуп, багыт көрсөтүп туруу зарыл. Бул жагынан алганда чыгармачыл союздар мамлекеттик колдоого муктаж", — деди Калыбеков.