Жусупов: 93 мал союучу жайдын 25инин иши бир айга токтотулду
© Sputnik / Сталбек Абдижалил уулу
Жазылуу
Айыл чарба министрлигине караштуу ветеринардык кызматтын директору Ашырбай Жусупов тамак-аш коопсуздугун камсыздоо артыкчылыктуу багыт экенин эске салды.
Өлкөдө 93 мал союучу жайдын 25инин иши ветеринардык-санитардык талаптарга жооп бербегени үчүн бир айга токтотулду. Бул тууралуу Ашырбай Жусупов Sputnik Кыргызстан радиосуна маек куруп жатып билдирди.
Жусупов: 93 мал союучу жайдын 25инин иши бир айга токтотулду
Анын айтымында, текшерүүлөр жарандардан түшкөн арыздын негизинде Экономика жана коммерция министрлигинин уруксаты менен жүргүзүлгөн.
"Тамак-аш коопсуздугу улуттук коопсуздукту камсыздоонун негизги багыты. Ветеринардык кызматтын максаты жарандарды сапаттуу, таза тамак-аш менен камсыздоо. Ошонун алкагында өлкөдөгү 93 мал союучу жай текшерилип, ветеринардык-санитардык талаптарга ылайык келбегендиктен 25инин иши бир айга токтотулду. Эгерде ушул убакытта алар кемчиликтерин жойсо иштөөгө уруксат берилет. Болбосо тийиштүү санкциялар кабыл алынат. Кыргызстан ЕАЭБдин мүчөсү катары уюмда кабыл алынган бирдиктүү ветеринардык-санитардык талаптар менен иш алып барат. Эгер ал талаптар аткарылбаса, биринчиден, бала-бакчадагы балдар, мектептеги окуучулар, ооруканадагы бейтаптар, аскердеги жоокерлер, жалпы жарандардын ден соолугуна кооптуулук жаралышы ыктымал. Экинчиден, өлкөнүн экспорттук имиджине терс таасирин тийгизет", — деди Жусупов.
Ошондой эле ал чар-жайыт уюшулган мал союучу жайлардан жугуштуу оорулардын тарап кетүү кооптуулугу жогору экенин кошумчалады.
