Батырбеков: муктаждыктан жаралган кадрлар ийгиликке жеткирди

"Эл аралык кино фестивалдан "Эң мыкты оператор" наамын биринчи жолу алып жатам. Буга чейин чакан фестивалдардан "Эң мыкты режиссер" сыйлыгына ээ болгом. Сегиз жылдан бери оператордун жардамчысы катары иштедим, ал эми соңку үч жылдан бери коюучу оператормун. Операторлук жактан алгачкы долбоорум "Кошунаны тандабайт" телесериалы болду. Анын 1-2-серияларын мен тарткам. Андан кийин Казакстандагы долбоорлордо тажрыйба топтодум. 1.1 studio даярдаган дээрлик бардык проектилерде жана бир катар кыска метраждуу тасмаларда оператор болуп эмгектендим. Жасаган иштеримдеги эң ири долбоор деп мына ушул "Жоокер" тасмасын айта алам, иштөөгө чакырышканы үчүн ыраазычылык билдирем. Бул тасманын 80 пайызы талаада тартылгандыктан бир топ кыйынчылыктар жаралды. Бирок ошол кыйынчылыктардын аркасы менен ийгиликке жетип отурабыз. Мен үчүн мындай тасмада иштөө чоң тажрыйба болду. Кинонун сюжети абдан оор. Анда адамдардын талашканы эмне экенин, эмне үчүн дүйнөдө согуштар токтобой келе жаткандыгы, адамзатты ойлондурчу көптөгөн маселелер көрсөтүлгөн. Өзгөчө тасма болгондуктан кайсы локацияда тартабыз деп көпкө ойлонуп, Боом капчыгайындагы бир жерге токтолдук. Бизге табият да жардам бергендей сезилди. Анткени ал жер так эле биздин тасмага ылайыкташтырылгандай экен. Өзүбүздү башка планетада жүргөндөй сездик. Оператор катары, жер тар болгондуктан адрестик план алууда кыйынчылык жаралганын айта алам. Ошол себептен да тасмадагы кадрлардын 70 пайызында аскерлер тыгыз кадрда көрсөтүлгөн. Биресе бул муктаждык болду, экинчи тараптан өзүнчө бир стиль болуп калды. Анткени аскерлердин кысымга, басымга кабылгандыгын жана башка көптөгөн ойлорумду ошол кадрлар менен берүүгө аракеттендим. Жыйынтыгында тасмабыз Россияда өткөн эл аралык кинофестивалда "Эң мыкты режиссер" жана "Эң мыкты оператор" наамдарына татыды", — деди кинооператор.