Салиев: "Смарт бажы" системасы Бажы кызматынын ишин автоматташтырат
© Sputnik / Асель Акмат
Жазылуу
Мамлекеттик бажы кызматынын төрагасынын орун басары Алмаз Салиев аталган тармакты санариптештирүү багытында жасалган иштер тууралуу маалымат берди.
"Смарт бажы" системасы Бажы кызматынын ишин, кызмат көрсөтүүлөрдү автоматташтырат. Бул тууралуу Алмаз Салиев Sputnik Кыргызстан радиосуна маек куруп жатып билдирди.
Салиев: "Смарт бажы" системасы Бажы кызматынын ишин автоматташтырат
Анын айтымында, президенттин 542-буйругунун негизинде Бажы концепциясын иштеп чыгуу тапшырылган.
"Санариптештирүү — бул чукул убакытта натыйжа бере турган иш эмес. Ал процесс ар дайым технологиянын өнүгүшүнө жараша жаңылоону талап кылат. Ошондуктан Бажы кызматында бул багытта иштер тынымсыз жүргүзүлүүдө. Эң башкы максат — бажы процесстеринде кызматкерлердин түз катышуусун минималдаштырып, мүмкүн болушунча аны жөнөкөйлөтүү. 2021-жылдын 2-декабрындагы президенттин 542-буйругу менен Бажы концепциясын иштеп чыгуу жана бажы процесстерин оптималдаштыруу тапшырылган. Анын негизинде министрлер кабинетинин 8-апрелдеги токтому менен 2022-2024-жылдарга Бажы кызматынын өнүгүү концепциясы жана аны ишке ашыруу планы бекитилген. Ошондой эле 50дөй модулдан турган автоматташтырылган "Смарт бажы" системасы иштелип чыгууда. Ал Бажы кызматынын ишин, кызмат көрсөтүүлөрдү автоматташтырат. Мындан тышкары, 2021-жылдын сентябрынан бери бардык өткөрмө пунктуларды борбордук аппараттан көзөмөл кылган система иштеп жатат. Ага улам жаңы функцияларды кошуу аркылуу учурда иштеп жаткан өткөрмө пунктулардан кирген автоунааларды киргенден тартып кампага барганга чейинки маалыматын көрүүгө мүмкүндүк түзүлдү. Ошондой эле өткөрмө пунктуларга номерлер аркылуу аныктоочу "эстүү камералар" орнотулган. Аны башка органдар менен интеграциялап, автоунаанын кожоюну боюнча маалымат алууга дагы мүмкүндүк түзүү каралууда", — деди Салиев.
Ошондой эле ал өткөрмө пунктулардагы текшерүү иштерин жөнөкөйлөтүү жана көзөмөлдү минималдаштыруу жаатында бир катар иштер жасала турганын кошумчалады.
