Садыр Жапаров ЖККУнун сессиясына катышууда. Президент токтолгон негизги маселелер
20:58 23.11.2022 (Жаңыртылды: 21:20 23.11.2022)
Жазылуу
Жапаров терроризм ЖККУга мүчө-мамлекеттердин коопсуздугуна олуттуу коркунуч келтирип жатканын белгилеген.
БИШКЕК, 23-ноя. — Sputnik. Мамлекет башчы Садыр Жапаров Еревандагы ЖККУнун Жамааттык коопсуздук кеңешинин кезектеги сессиясына катышууда.
Президенттин маалымат кызматы билдиргендей, сессияда Жапаров Кыргызстан аймактагы коопсуздукту жана туруктуулукту сактоо үчүн көп функциялуу аймактык түзүм катары уюмдун потенциалын чыңдоого кызыкдар экенин белгилеген.
"Маанилүү шарттардын бири — саясий бөлүгүн жакшыртуу жана уюмдун эл аралык имиджин бекемдөө", — деген Жапаров.
Президент токтолгон орчундуу маселелер:
Кыргызстан ар кандай пикир келишпестиктерди саясий жана дипломатиялык ыкмалар менен гана сүйлөшүп чечүү зарыл деген позицияны жактап келген жана жактай берет;
Афган факторун эске алуу менен ички чек араларда коопсуздукту камсыздоо боюнча күч-аракеттерди бириктирүү зарыл. Терроризм ЖККУга мүчө-мамлекеттердин коопсуздугуна олуттуу коркунуч келтирүүдө;
Ушул жылы Кыргызстандын аймагында ЖККУга мүчө-мамлекеттердин атайын күчтөрүнүн бөлүкчөлөрүнүн катышуусунда "Кобальт-2022" машыгуусу ийгиликтүү өттү;
Кыргыз тарап жамааттык коопсуздук системасын чыңдоо үчүн биргелешкен ыкчам жана күжүрмөн даярдыкты жакшыртууга, ошондой эле сырттан келген терс таасирлердин аракеттерине өз убагында жана натыйжалуу жооп берүүгө даяр;
Кыргызстан аймактык коопсуздуктун эффективдүү механизми катары уюмдун потенциалын чыңдоого кызыкдар жана жамааттык коопсуздук системасын өркүндөтүү боюнча мындан аркы биргелешкен аракеттерге даяр.
