Акулов: эми корголуучу жаратылыш аймактарын жергиликтүү бийлик түзө алат
© Sputnik / Асель Акмат
Жазылуу
Жаратылыш ресурстары, экология жана техникалык көзөмөл министрлигинин Биотүрдүүлүктү сактоо жана өзгөчө корголуучу жаратылыш аймактар департаментинин башкы адиси Руслан Акулов тоо экосистемасын коргоо боюнча иштер тууралуу айтып берди.
"Жашыл мурас" долбоорунун алкагында беш миллиондон ашуун көчөт отургузулду. Бул тууралуу Руслан Акулов Sputnik Кыргызстан радиосуна маек куруп жатып билдирди.
Акулов: эми корголуучу жаратылыш аймактарын жергиликтүү бийлик түзө алат
Анын айтымында, Тоолордун экосистемасын коргоо жана климаттык туруктуулук жылынын алкагында өкмөт тарабынан тийиштүү иштер аткарылууда.
"Ушул жылдын март айында министрлер кабинетинин 95-токтому менен жол карта бекитилген. Анын алкагында "Жашыл мурас" платформасы ишке ашырылууда. Алсак, быйыл беш миллиондон ашуун көчөт отургузулду. Ошондой эле бул иш-чара "ар бир жарандан бирден көчөт" деген ураан менен беш жылга чейин узартылды. Учурда аймактарда күзгү көчөттөрдү отургузуу иштери жүргүзүлүүдө. Мындан тышкары, министрлер кабинетинин биотүрдүүлүктү сактоо боюнча токтому иштелип чыкты. Ага ылайык, жергиликтүү маанидеги өзгөчө корголуучу жаратылыш аймактарын түзүү мүмкүн болот. Башкача айтканда, аталган аймактарды түзүү республикалык деңгээлде эмес, жергиликтүү бийлик тарабынан да ишке ашат. Мурда бул иштер өкмөттүн деңгээлинде гана ишке ашчу. Азыр айылдык кеңештин чечими, айыл өкмөттүн токтому менен жергиликтүү маанидеги өзгөчө корголуучу жаратылыш аймактарын түзүүгө болот", — деди Акулов.
Ошондой эле ал мындай иш-чараны ар бир жаран демилгелей аларын кошумчалады.
